Britaniya Şimali Koreyanı tərk etməyəcək

Britaniya yaxın zamanda Pxenyandakı səfirliyinin əməkdaşlarını çıxarmağı planlaşdırmadığını bildirib.

Lent.az-ın «BBC»-yə istinadən məlumatına görə, rəsmi London Şimali Koreyanın xarici diplomatların ölkəni tərk etməsi ilə bağlı təklifinə cavab olaraq, belə açıqlama yayıb.

«Onlar səfirlik və təşkilatlardan xahiş edib ki, əgər Pxenyanın tərk etmək istəyən varsa, bu haqda aprelin 10-dək yardım üçün müraciət edə bilər. Biz xarici tərəfkeşlərimizlə bu məsələ ilə bağlı məsləhətləşmə aparmışıq. Ölkəni təcili olaraq, tərk etmək barədə hər hansı qərar qəbul olunmayıb. Bizim səfirliyin də belə bir planı yoxdur».

Britaniyanın Xarici İşlər Nazirliyi rəsmi Pxenyan tərəfindən ölkəni tərk etmək barədə təklif aldıqlarını və bunun ehtimal olunan təhlükənin bir hissəsi olduğunu bildirib.

Aprelin 5-də Avropa Birliyinə üzv dövlətlərin Şimali Koreyadakı səfirliklərinin diplomatları məsələni birgə müzakirə edib. Onların Koreya yarımadasının bu hissəsini tərk edəcəkləri də ehtimal olunur.

Xatırladaq ki, ABŞ mütəxəssisləri hesab edir ki, Şimali Koreya rəhbərliyi raketləri aprelin 15-də, bu respublikanın qurucusu Kim İr Senin anadan olmasının 101-ci ildönümü münasibəti ilə buraxa bilər.