Berluskoni danışdı: “Bü zülmə qarşı müqavimət göstərəcəm...”

“Bü zülmə qarşı müqavimət göstərəcəm, çünki günahsızam”. Lent.az-ın “Reuters” agentliyinə istinadən verdiyi məlumata görə, bunu bu gün Milan Məhkəməsinin qərarına münasibət bildirən İtaliyanın sabiq baş naziri, parlamentdəki deputat mandatının sayına görə ikinci yerdə olan Azad Xalq Partiyasının lideri Silvio Berluskoni bəyan edib.

Qeyd edək ki, iyunun 24-də Milan məhkəməsi İtaliyanın keçmiş baş naziri Silvio Berluskoniyə 7 il iş kəsib. Sabiq baş nazir “həddi-büluğa çatmayanların fahişəliyə cəlb edilməsində iştirak etməkdə və vəzifədən sui-istifadə” də ittiham olunub. Məhkəmənin qərarına əsasən, Silvio Berluskoni ömrünün sonunadək dövlət qurumlarında çalışa bilməz.

Silvio Berluskoniyə qarşı məhkəmə prosesi 2011-ci ilin aprelindən başlayıb. İstintaq onu “Rubi” ləqəbli gənc mərakeşli ilə intim əlaqdə olmaqda suçlu sayır. Silvio Berluskoniyə pullu “xidmət edən” dövrdə onun 18 yaşı tamam olmayıb.

Silvio Berluskoni isə deyib ki, İtaliyanı azad və ədalətli bir ölkəyə çevirmək uğrunda mübarizəsindən heç bir şəkildə vaz keçməyəcək. Onun sözlərinə görə, bu qərar tək məhkəmə, ədalət sistemi baxımından pis bir səhifə deyil, həm də italyanlara həqarət anlamına gəlir. Silvio Berluskoni onu məhz İtaliya siyasi səhnəsindən uzaqlaşdırmaq üçün belə bir qərar verildiyinə qəti əmin olduğunu vurğulayıb.

Silvio Berluskoninin oğlu Pier-Silvio Berluskoni də atasının məhkəmə prosesi dönəmində daha çox danışmamağa üstünlük verdiyinə diqqət çəkib və məhkəmənin qərarını çox sərt sayıb.