ABŞ qaçqın kəşfiyyatçıya görə Rusiya ilə münasibəti korlamayacaq

Səudiyyə Ərəbistanında səfər olan ABŞ-ın dövlət katibi Con Kerri Mərkəzi Kəşfiyyat İdarəsinin keçmiş əməkdaşı Edvard Snoudenlə bağlı Rusiya ilə qarşıdurmaya getməyə ehtiyac olmadığını bildirib.

Lent.az-ın «İnterfaks»-a istinadən məlumatına görə, amerikalı diplomat ümidvarlıqla deyib ki, Rusiya ABŞ-ın ədalət məhkəməsindən gizlənən bir şəxsi müdafiə etməkdə maraqlı olmayacaq.

Bir müddət öncə Kerri ABŞ-ın «NBC» telekanalına müsahibəsində bildirib: «Moskvadan Havanaya uçan təyyarədə Snoudenin olmaması yaxşı əlamətdir.Tələsik mühakimə yürütmək istəməsəm də, ancaq onu deyə bilərəm ki, bu məsələ bizim üçün çox vacibdir və ümidvaram ki, olaylar lazımi istiqamət inkişaf edəcək».

«Biz sadəcə olaraq, Rusiya tərəfinin bizi anlayacağına və bu məsələyə daha ciddi yanaşacağına inanırıq. Biz bu və başqa şəkildə əməkdaşlıq edəcəyimizə ümid edirik»-deyə, dövlət katibi söyləyib.

O, qeyd edib ki, Snouden məsələsinə dair Rusiya hakimiyyəti ilə təmasları davam etdirirlər.