ABŞ-la Kuba danışıqları bərpa edir

ABŞ-la Kuba mühacirlərin məsələsi ilə bağlı danışıqların bu il iyulun 17-də bərpa edilməsinə dair razılıq əldə edib.

Lent.az-ın xarici informasiya vasitələrinə istinadən məlumatına görə, mütəxəssislər bunu iki ölkə arasında münasibətlərin istiləşməsi kimi dəyərləndirib.

Danışıqlara bərpasına cəhd 2009-cu ildə ABŞ vətəndaşı, «Development Alternatives» şirkətinin əməkdaşı Alan Qrossun Kubada həbsi ilə əlaqədar dayandırılmışdı. Onda Kuba hakimiyyəti amerikalını rabitə avadanlığınının qaçaqmalçılığında ittiham etmişdi. Ölkə məhkəməsi Alan Qrossu «Kubanın müstəqilliyinə və ərazi bütövlüyünə qarşı» çıxmaqda ittiham edərək, ona 15 il iş vermişdi.

Xatırladaq ki, ABŞ 50 ildən artıqdır Kubaya qarşı embraqo tətbiq edib. İki ölkə arasında diplomatik və iqtisadi-ticarət əlaqələri də o vaxtdan kəsilib.