Hindistanın Bihar ştatının sakini dünyanın ən bahalı manqolarından biri olan “miyadzaki” manqosunu qorumaq üçün xüsusi üsula əl atıb.
Lent.az xəbər verir ki, bunun üçün o, kameralar quraşdırıb və yerli sakinləri işə götürüb.
“Bu, Yaponiyanın Miyadzaki prefekturasında yetişən “Tayo no Tamaqo” və ya “Günəş yumurtası” kimi adlanan dünyanın ən bahalı manqosudur. Bu manqo ağacının 25 yaşı var. Ağac ştatın qanunverici məclisinin keçmiş üzvü Acit Sarkarın qızına hədiyyə edilib. Bu, dünyanın ən bahalı manqosudur”, - deyə ağacın sahibi Vikas Das “RİA Novosti”yə bildirib.
O qeyd edib ki, ağac yerli sakinlər tərəfindən qorunur və video nəzarət altındadır. Das qeyd edib ki, bu manqo növünün xüsusi dadı və qoxusu var, onu bazarda deyil, hərrac təşkil edərək satmağı düşünür.
“Miyadzaki” manqoları öz adını vətəni Yaponiyanın eyniadlı prefekturasından alıb. Orta hesabla bir manqo meyvəsi təxminən 350 qramdır və antioksidant, beta-karotin və folik turşusu ilə zəngindir. Bu meyvədəki şəkər miqdarı da digər manqo növlərindən orta hesabla 15% yüksəkdir. “Miyadzaki” manqosunun 1 kiloqramının qiyməti 8 min rupidən (107 dollar) başlayır və 270 min rupiyədək (3,6 min dollar) qalxa bilər.