Novruz bayramında İrandan Ermənistana 25 min turist gedib

Ermənistana siyasi və iqtisadi dəstəyini açıq şəkildə göstərən İran turizm sahəsində də bu ölkənin ən yaxın tərəfdaşları sırasında yer alır. Hazırda Ermənistana gələn xarici turistlərin içərisində say çoxluğuna görə ilk yerdə dayanan iranlıların sayı ilbəil artmaqdadır.

Lent.az xəbər verir ki, Ermənistan İqtisadiyyat Nazirliyinin Turizm və İqtisadi İnkişaf İdarəsinin açıqladığı son statistikaya görə, bu ilin 3 ayında Ermənistana İrandan 31700 turist gəlib. Maraqlısı isə odur ki, bu qədər turistdən 25 min nəfəri Ermənistana xristian dünyasının, özəlliklə də ermənilərin qeyd etmədiyi Novruz bayramı günlərində gəlib.

Ötən ilin ilk üç ayında Ermənistana 28 min, 2010-cu ildə isə ümumilikdə 120 min iranlı turist səfər edib. Aparılan sorğu zamanı turistlərin böyük əksəriyyətinin 30-40 yaş arasında olduğu, 70 faizinin isə ailələri ilə birgə səfər etdiyi məlum olub. Hər bir iranlı turist 10 günlük səfər müddətində Ermənistan büdcəsinə 1600 dollar xeyir verib.
Rəşad