Qəddafi silahı yerə qoydu

BMT Təhlükəsizlik Şurasının Liviya üzərində hava məkanını uçuşlara qapalı elan etməsindən sonra Liviya lideri Müəmmər Qəddafiyə sadiq qüvvələr hərbi əməliyyatları dayandırmaq qərarına gəliblər. Lent.az-ın məlumatına görə, Liviyanın paytaxtı Tripolidə olan “CNN” müxbiri Nic Robertson deyib ki, Müəmmər Qəddafinin oğlu Seyf əl-İslamla telefonla danışıb.

Seyf əl-İslam hökumət qüvvələrinin Benqazi ilə bağlı taktika dəyişdirdiyini, bu qüvvələrin hücuma keçməyərək şəhər ətrafında yerləşəcəyini bildirib. O, taktika dəyişikliyinin humanitar məqamlarla bağlı olduğunu, məqsədin şəhərdə çətin vəziyyətdə qalan və baş verəcək hadisələrdən qorxan insanların evakuasiyasına yardım etməkdən ibarət olduğunu söyləyib. Seyf əl-İslam qeyd edib ki, Liviya hökuməti Benqaziyə yalnız polis, terrorla mübarizə dəstələri göndərəcək və onlar da qiyamçıları silahsızlaşdıracaq.

“CNN” müxbiri Seyf əl-İslamla BMT Təhlükəsizlik Şurasının qərarından əvvəl danışdığını da qeyd edib.

Bu arada Liviyanın xarici işlər naziri Musa Kusa “Əl-Cəzirə” telekanalına açıqlamasında bildirib ki, BMT Təhlükəsizlik Şurasının qətnaməsinə uyğun olaraq ölkəsi bütün hərbi əməliyyatları təcili dayandırır. Onun sözlərinə görə, Liviya hökuməti bütün səyləri göstərəcək ki, ölkədə sülhü, qanun-qaydanı bərqərar etsin. Musa Kusa BMT Təhlükəsizlik Şurasının Liviya üzərindəki hava məkanında uçuşlara qadağa qoymasından da təəssüflənib. O, Liviya vətəndaşlarının xarici ölkələrdəki aktivlərinin dondurulmasından da əziyyət çəkəcəklərini vurğulayıb. Musa Kusa dünya ictimaiyyətinin Liviyanın hökumət qüvvələrinə qarşı güc tətbiqi ilə bağlı qərarını da düşünülməmiş adlandırıb. O, Liviya hökumətinin ölkənin suverenliyində və ərazi bütövlüyünün qorunub saxlanılmasında maraqlı olan bütün qüvvələrlə danışıqlara hazır olduğunu da dilə gətirib. Xarici işlər naziri sonda dünya ictimaiyyətini baş verən hadisələri yerində araşdırmaq üçün xüsusi komissiya göndərməyə çağırıb.