20 milyard dollarlıq layihə suya düşdü

Türkiyənin Sinop rayonunda tikilməsi nəzərdə tutulan atom elektrik stansiyası (AES) ilə bağlı 8 aydır ki, davam edən müzakirələr uğursuzluqla yekunlaşıb. Lent.az-ın Türkiyənin NTV telekanalına istinadən verdiyi məlumata görə, Seulda 20-lərin sammitinə qatılan Türkiyənin baş naziri Rəcəb Tayyib Ərdoğan və Cənubi Koreya prezienti Lee Myung Bak arasında dəyəri 20 milyard dollar olan AES layihəsi ilə bağlı görüş keçirilib.

Türkiyənin enerji və təbii qaynaqlar naziri Taner Yıldız deyib ki, tərəflər bu məsələdə qərarlı olsalar da, bəzi şərtlərlə bağlı bu dəfə də razılığa gəlmək mümkün olmayıb: “Son görüşdə də bu nöqtələri aşa bilmədik. Bəzi yaxşı şərtlər irəli sürülüb, bunları da dəyərləndirəcəyik. Ancaq bundan sonra digər ölkələrlə də görüşməyə başlayacağıq. Çünki müzakirə dövrünün sürətlə başa çatması və tikintinin başlaması lazımdır”.

Taner Yıldız, Avropa, ABŞ və Yaponiyanın bu sahədə ixtisaslaşmış şirkətləri ilə danışıqlar aparılacağını söyləyib. İlk görüş Yaponiyanın “Toshiba” şirkəti ilə nəzərdə tutulur.