Çernomırdin dəfn edildi

Bu gün Rusiyanın sabiq baş naziri, Rusiyanın Ukraynadakı sabiq səfiri Viktor Çernomırdin Moskvanın Novodeviçi qəbiristanlığında dəfn olunub. Lent.az-ın Rusiya mətbuatına istinadən verdiyi məlumata görə, dəfndən öncə monastırda Moskva və Ümumrusiya patriarxı Krillin iştirakı ilə mərasim keçirilib.

Viktor Çernomırdin bu ilin martında vəfat edən həyat yoldaşının yanında dəfn edilib. Viktor Çernomırdinlə vida mərasimində Rusiyanın prezidenti Dmitri Medvedev və baş nazir Vladimir Putin iştirak ediblər. Rusiyanın birinci prezidenti Boris Yeltsinin xanımı Naina Yeltsina, Ukraynanın sabiq prezidenti Leonid Kuçma, Rusiyanın sabiq baş naziri Yevgeni Primakov, Moskvanın meri Sergey Sobyanin, digər siyasətçilər və ictimai xadimlər də dəfn mərasiminə qatılıblar.

Rusiya prezidenti Dmitri Medvedev deyib ki, Rusiya-Ukrayna münasibətlərinin yaxşılaşmasında Viktor Çernomırdinin əməyi böyükdür. Vladimir Putin isə bildirib ki, Viktor Çernomırdin bütün siyasətçilər üçün bir nümunədir.