Zəlzələ dünyanı silkələdi

Bu gecə Türkiyə, Avropa, Uzaq Şərq və Şimali Amerikada zəlzələ baş verib. Lent.az-ın “Reuters” agentliyinə istinadən verdiyi məlumata görə, Türkiyədə zəlzələnin ocağı Saros körfəzində olub.

5,3 bal gücündə zəlzələ gecə saat 4:51 radələrində baş verib. İstanbulda insanlar təlaşla küçələrə axışıblar. Titrəyişlər 10-15 saniyə davam edib. Zəlzələ Tekirdağ, Ədirnə, İzmir və Çanakkalada da hiss edilib.

Çanakkalada insanlar yeni bir zəlzələ ehtimalı ilə əlaqədar hələ də küçələrdə gözləyirlər. Hələ ki, dağıntı və tələfat barədə məlumat daxil olmayıb.

Serbiyanın mərkəzində isə 5,3 bal gücündə zəlzələ qeydə alınıb. 2 nəfər ölüb, 15 nəfər xəsarət alıb, bir çox binalar zərər görüb. Paytaxt Belqradda da zəlzələ hiss olunub.

Uzaq Şərqdə, Rusiyanın Susumansk rayonunda da zəlzələ olub. Dağıntı və tələfat yoxdur.

Çilidə isə 5,7 bal gücündə zəlzələ baş verib. Zəlzələnin ocağı Maul, Bio-Bio, Arakuaniya bölgələrində olub. Hələlik dağıntı və tələfat barədə məlumat daxil olmayıb.