Merkelə, Sarkoziyə və Berluskoniyə bombalı zərflər göndərilib

Partlayış təhlükəsi səbəbindən Yunanıstanda 2 sutka ərzində aviareyslər dayandırılıb. Lent.az-ın “Exo Moskvı” radiosuna istinadən verdiyi məlumata görə, bu, Yunanıstanda poçt vasitəsilə partlayıcı maddələr göndərilməsinin aşkarlanması ilə əlaqədardır.

Qeyd edək ki, Yunanıstanda naməlum şəxslər zərfin içərisində poçtla Almaniyanın baş naziri Angela Merkel, Fransa prezidenti Nikolas Sarkoziyə partlayıcı maddə göndəriblər. Partlayıcılar Afinada aşkarlanıb. “Evropol” və Avropa Məhkəməsinə göndərilən partlayıcılar da elə Afinanın beynəlxalq aeroportunda məhv edilib.

İtaliyanın baş naziri Silvio Berluskoniyə zərfdə göndərilən partlayıcı isə poçt yükünü aparan təyyarə havaya qalxandan sonra aşkarlanıb. Afinadan qalxan təyyarə təcili olaraq Bolonya şəhər aeroportuna enib.

Yunanıstandakı xarici ölkə səfirliklərinə də zərflə göndərilən bomba aşkarlanıb. Rusiya səfirliyinə də zərfdə bomba gəlib. Partlayıcılar zərərsizləşdirilib.