Baş nazir bu dəfə 17 yaşlı qızla...

Lent.az-ın “Milliyət” qəzetinə istinadən verdiyi məlumata görə, Silvio Berluskoninin 18 yaşına çatmamış, miqrant kimi İtaliyaya gəlmiş qızla cinsi əlaqədə olduğu barədə xəbər İtaliyada müzakirə mövzusudur.

Əsl adı açıqlanmayan, şərti olaraq “Ruby” adı ilə təqdim olunan qız İtaliya polisinə ifadəsində bildirib ki, keçən ilin yazında Silvio Berluskoni onunla Milan şəhərinin kənarında villasında cinsi əlaqədə olub. Hazırda 18 yaşı olan gənc qız baş nazirə Lele Mora adlı bir iş adamı tərəfindən təqdim edildiyini, model və aktrisa olmaq arzusuna görə bu görüşə getdiyini bildirib.

İtalyan mətbuatı yazır ki, olayın üstü qızın Milanda bir evdə qaldığı braziliyalı dostu ilə mübahisə etdikdən sonra həmin evdən çıxmaq məcburiyyətində qalması sonucunda açılıb. Polis tərəfindən saxlanılan qızın İtaliyada yaşamaq üçün lazımi icazəsinin olmadığı öyrənilib. Ruby isə baş nazir Silvio Berluskonini tanıdığını söyləyib və ona qarşı yaxşı davranılmasını istəyib. Sonra da başına gələnləri polis şöbəsində danışıb.

Polis rəsmi təhqiqata başlamasa da, araşdırma aparır. İtaliya Prokurorluğu hələ məsələ ilə bağlı şərh verməyib.