Nəsimi Nəbizadə ilə "Ana xəbər" bloku – 23 Aprel

GÜNÜN ŞƏRHİ

Ermənilərin 100 illiklə bağlı gözləntilərini iflasa uğramış saymaq olar. Roma Papasının bəyanatı, Avropa Parlamentinin və Avstriya parlamentinin qondarma “soyqırımı” tanımaq qərarından başqa ciddi nəticə əldə olunmadı. İrəvanda keçiriləcək 100 illik tədbirlərini də ciddi uğur saymaq olmaz. Tədbirə qatılacaq dövlət başçıları balansı qorumağa üstünlük verir, Rusiya prezidenti İrəvana səfərlə bağlı Türkiyə prezidentini məlumatlandırır, Fransa prezidenti İrəvandan sonra Bakıya səfər etməklə 100 illik mərasiminə özəl olaraq deyil, Qafqaz turnesi çərçivəsində qatıldığını göstərməyə çalışır. Səbəb təkcə Türkiyə və Azərbaycanın xüsusi çəkisinin Ermənistandan qat-qat artıq olması deyil. Ermənilərin 100 illik gözləntilərinin iflasa uğramasının əsas səbəblərindən biri Ermənistanın xarici siyasət kursudur. Rusiyaya etiraz olaraq Qələbə Paradına qatılmayan Avropa dövlətlərinin Rusiyanın forpostu olan Ermənistana hansısa formada dəstək verəcəyini gözləmək sadəlövhlük olardı. 24 apreldən sonra 25 aprel başlayacaq və hətta emosiyalarla qərar verən dövlətlər belə yenidən öz siyasətlərinə korrektə etməli olacaqlar. Günün gerçəkliyi budur, gerçəklər isə həmişə xəyalların üzərinə su səpir.