Daha 3 qəzet “qara siyahı”ya salınacaq

Bu gün Mətbuat Şurası “Reket jurnalistika”ya qarşı mübarizə Komissiyasının iclası keçirilib.

Mətbuat Şurasından Lent.az-a verilən məlumata görə, Mətbuat Şurasının İdarə Heyətinin üzvü, “İki sahil” qəzetinin baş redaktoru Vüqar Rəhimzadənin başçılıq etdiyi komissiyanın üzvləri 8 mətbu nəşrlə bağlı məsələləri araşdırıblar.

Öncə Mətbuat Şurasının Şikayətlər üzrə Komissiyasının 26 may tarixli iclasının tövsiyəsinə uyğun olaraq 3 qəzet barədə müzakirələr aparılıb. Digər 5 şikayət isə Mətbuat Şurasının Katibliyi tərəfindən təqdim olunub.

Komissiya mətbu nəşrlərdən 3-nün fəaliyyətində “reket jurnalistika”ya xas cəhətlərin özünü açıq şəkildə biruzə verdiyini müəyyənləşdirib. Nəzərə alınıb ki, fəaliyyəti narazılıq doğuran KİV-lərdə gedən digər materiallar da müzakirə predmetinə çevrilə bilər. Buna görə də onların adlarının Mətbuat Şurasının “qara siyahı”sına salınması üçün Mətbuat Şurasının İdarə Heyətinə müvafiq rəy təqdim olunmalıdır. Komissiya digər 5 qəzetlə bağlı araşdırmaların davam etdirilməsini məqsədəuyğun sayıb.