Vergi Apellyasiya Şurası Nigar Köçərlinin müraciətinə baxıb

Vergi Apellyasiya Şurası vergi ödəyicisi kimi Bakı şəhəri Vergilər Departamentində qeydiyyatda olan fiziki şəxs İsmayıl Mürsəl oğlu İmanovun fəaliyyəti ilə bağlı aparılmış səyyar vergi yoxlaması aktında göstərilən məbləğlərin silinməsi barədə Nigar Köçərlinin müraciətinə baxıb. Lent.az-ın Vergilər Nazirliyinin rəsmi saytına istinadən verdiyi məlumata görə, müəyyən olunub ki, Vergi Auditi Departamenti 21 dekabr2010-cu il tarixli qərara əsasən İsmayıl İmanovun həmin ilin yanvar-noyabr ayları üzrə fəaliyyəti ilə bağlı növbədənkənar səyyar vergi yoxlaması həyata keçirib.

Departamentin 24 fevral 2011-cil tarixli qərarına əsasən ödəyicinin icarə müqavilələri üzrə bazar qiymətlərinin müəyyənləşdirilməsi üçün Azərbaycan Respublikası Sənaye və Ticarət Palatasının “Azərekspertiza” Birliyindən ekspert dəvət edilib. Araşdırma nəticəsində məlum olub ki, sahibkar tərəfindən icarəyə götürülmüş obyektlərin müqavilələrdə nəzərdə tutulan icarə haqqı məbləğləri faktiki icarə haqqı məbləğlərindən xeyli az göstərilib.

Apellyasiya Şurasının iclasında Nigar Köçərli özü də həmin qiymətlərin real olmadığını etiraf edib. Yoxlanılan dövrdə sahibkar ödəmə mənbəyində tutulan vergini 1,5 min manat azaldıb, nəticədə ona həmin məbləğin 50% miqdarında, yəni 774,9 manat maliyyə sanksiyası tətbiq edilib. Aparılmış inventarizasiya üzrə uçota alınmamış mal-material dəyərlilərinin ümumi məbləği 76,7 min manat müəyyən edilib. Gizlədilmiş və ya uçota alınmamış sərvətlərin və ya vəsaitin ümumi məbləğinin 1000 manatdan çox olan hissəsinə həmin məbləğin 5 faizi miqdarında, yəni 3,8 min manat məbləğində maliyyə sanksiyası tətbiq edilib.

Şuranın iclasında iddiaçı sahibkara aid olan kitab mağazalarındakı kitabların fərdi uçotunun aparıldığını, hər bir kitab üzrə ştrix-kod vasitəsilə müvafiq məlumatların elektron bazaya daxil edildiyini bildirib və bu yoxlama materialları ilə də təsdiqlənib. Lakin alış sənədləri qaydasında olmadığından yoxlayıcı tərəfindən haqlı olaraq maliyyə sanksiyası tətbiq olunub. Nigar Köçərli qeyd olunan iradları qəbul etdiyini, sənədlərin tam qaydasında olmamasının bəzi, ondan asılı olmayan səbəblərlə bağlı olduğunu göstərərək, onların aradan qaldırılması üçün təcili tədbirlər görəcəyini vəd edib.

Qeyd olunanları nəzərə alaraq Apelyasiya Şurası Nigar Köçərlinin 5 may 2011-ci il tarixli ərizəsinin qismən təmin edilməsi barədə qərar çıxarıb. Yoxlama aktında göstərilən ödəmə mənbəyində azaldılmış 1,5 min manat vergi məbləği və həmin məbləğə əsasən tətbiq edilmiş 774,9 manat maliyyə sanksiyasının qüvvədə saxlanılması, lakin aparılmış inventarizasiya üzrə uçota alınmamış, ümumi məbləği 76,7 min manat olan mal-material dəyərlilərinin müəyyən edilməsinə görə tətbiq edilmiş 3,8 min manat maliyyə sanksiyasının ləğv edilməsi qərara alınıb.

Qeyd edək ki, Nigar Köçərli “Əli və Nino” kitab mağazaları şəbəkəsinin sahibidir.