“Magistr” jurnalının 4-cü sayı nəşr olunub

Tələbə Qəbulu üzrə Dövlət Komissiyası (TQDK) tərəfindən “Magistr” jurnalının 4-cü sayı nəşr olunaraq bakalavrların istifadəsinə verilib. TQDK-nın mətbuat xidmətindən Lent.az-a verilən məlumata görə, jurnalda 2011/2012-ci tədris ili üçün ali təhsil müəssisələrinin magistraturalarına qəbul imtahanının ikinci mərhələsi, proqram və ixtisaslaşma seçimi haqqında elan, “Bakalavrın elektron ərizəsi”ndə qəbul proqramının seçilməsi və təsdiqi üçün təlimat, qəbul proqramının seçimi üçün “Bakalavrın elektron ərizəsi” formasının nümunəsi, qəbul aparılan ixtisaslaşmalar və magistratura səviyyəsinə dövlət sifarişi ilə tələbə qəbulunun proqnozu ilə bağlı materiallar yerləşdirilib.

Qəbul elanına əsasən, ali təhsil müəssisələrinin magistraturalarına 20 fevral 2011-ci il tarixində keçirilmiş qəbul imtahanının birinci mərhələsinin nəticələrinə görə müsabiqə şərtlərini ödəyən bakalavrlar imtahanın ikinci mərhələsinə buraxılır və proqram seçimində iştirak edirlər. Bunun üçün bakalavrlar iyunun 8-dən 15-dək elektron ərizələrinə daxil olaraq bitirdikləri bakalavr ixtisasına uyğun qəbul proqramını və ixtisaslaşmaları seçib təsdiq etməlidirlər. Həmin proqramların siyahısı “Magistr” jurnalının 2011-ci il 3-cü sayında dərc olunub.

Proqram və ixtisaslaşmaları seçib təsdiq etmiş bakalavrlar iyunun 23-dən 25-dək öz elektron ərizələrinə daxil olaraq ikinci mərhələ üçün “Bakalavrın imtahana buraxılış vərəqəsi”ni çap edib götürməlidirlər.

Qəbul imtahanının ikinci mərhələsi 2011-ci il iyunun 26-da Bakı, Naxçıvan və Gəncə şəhərlərində keçiriləcək. İmtahanın ikinci mərhələsində bakalavrların ixtisas üzrə bilikləri test üsulu ilə onlara 50 test tapşırığı təqdim olunmaqla (bəzi proqramlar üzrə isə yazılı imtahanla) yoxlanılır. İkinci mərhələdə imtahan suallarının cavablandırılmasına 1 saat 30 dəqiqə vaxt ayrılır. İxtisas üzrə test tapşırıqlarına cavabın maksimal qiyməti 50 baldır. Yazı işləri və qabiliyyət imtahanının nəticəsi də 50 ballıq şkalada qiymətləndirilir.