Bakı Neft Emalı Zavodunun yeraltı anbarı əsl təhlükə mənbəyinə çevrilib

Heydər Əliyev adına Bakı Neft Emalı Zavodunda neftin ilkin emalı üzrə 21 nömrəli “ED-AVQ-6” qurğusunda aparat və avadanlıqların drenaj edilməsi zamanı neft məhsullarının yığıldığı yeraltı anbarın tutumunun dəyişdirilməsi işinə başlanılıb. Lent.az-ın ARDNŞ-in rəsmi saytına istinadən verdiyi məlumata görə, qurğunun ərazisində quraşdırılmış bu yeraltı anbar uzun illər istifadə olunduğundan istismar müddətini başa vurub və aşınmaya məruz qalaraq əsl təhlükə mənbəyinə çevrilib.

Bütün bunlar nəzərə alınaraq həmin yeraltı anbarın ləğv olunması istiqamətində işlərə başlanılıb. Eyni zamanda “ED-AVQ-6” qurğusunun yerləşdiyi ərazidən kənarda, germetikliyi ilə seçilən 2 ədəd 38 kubmetr həcmli yeni yeraltı anbarın quraşdırılması işlərinə başlanılıb. Tikinti işləri artıq başa çatmaq üzrədir. Əvvəlkilərdən fərqli olaraq, neft məhsulları yeni anbarlardan azotun vasitəsilə yaranan təzyiq hesabına nəql ediləcək və bu da enerjiyə qənaət etməyə imkan verəcək. Köhnə anbarlarda istifadə olunan nasoslar xeyli enerji sərfinə səbəb olub. Bundan sonra nasoslardan ancaq qurğuda qəza vəziyyəti yarandıqda istifadə ediləcək. Ərazidə yanğın təhlükəsizliyinin qarşısını maksimum almaq üçün betonlama işləri yerinə yetirilib, təmizlik, abadlıq işləri aparılıb.