Bakıda keyfiyyətsiz “Tərxun” və “Düşes” istehsal edildiyi aşkarlandı

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı şəhəri, Nizami rayonu, Naxçıvanski küçəsi, 34A ünvanında İzayət İsmayılova məxsus istehsalat sahəsində aparılan yoxlama zamanı “Tərxun” sərinləşdirici içkilərinin, qazlı və saf suların uyğunluq sertifikatı olmadan istehsal edildiyi, həmin məhsulların, eləcə də “Düşes” sərinləşdirici içkisinin yararlılıq müddətinin heç bir normativ sənədə əsaslanmadan təyin olunduğu müəyyən edilib. Lent.az-ın İqtisadi İnkişaf Nazirliyinin rəsmi saytına istinadən verdiyi məlumata görə, qanun pozuntuları ilə əlaqədar “Düşes” və “Tərxun” sərinləşdirici içkilərinin, qazlı və saf suların istehsalının dayandırılması və müəssisə tərəfindən ticarət şəbəkəsinə paylanmış həmin məhsulların geri yığılması, eləcə də uyğunluq sertifikatı olmadan istehsal edilmiş 5857,5 litr sərinləşdirici içkilərin qanunvericiliyə müvafiq qaydada məhv edilməsi barədə Dövlət Xidməti tərəfindən sahibkar İzayət İsmayılova icrası məcburi göstəriş verilib.

Araşdırmalar davam edir.