“Tələbələr azad sahibkarlıq fəaliyyətində”

Nazirliyin mətbuat xidmətindən Lent.az-a verilən məlumata görə, respublika çempionatının açılış mərasimi mayın 20-də Monolit Plaza otelində baş tutacaq. SİFE proqramı üzrə çempionatın keçirilməsində əsas məqsəd Azərbaycanın iqtisadi potensialının gücləndirilməsində gənclərin rolunu artırmaq, onların sahibkarlıq fəaliyyətini stimullaşdırmaq, azad sahibkarlığın ideyasını tələbələr arasında təbliğ etmək, tələbələrin təşkilatçılıq, idarəçilik və komandada işləmək qabiliyyətlərini inkişaf etdirməkdir.

Builki çempionatda 15 komanda iştirak edir ki, onlar tərəfindən biznes, təhsil, ekologiya və sosial sahələri əhatə edən 50-dən artıq layihə icra olunacaq. Çempionatın nəticəsinə əsasən, qalib gələcək komanda cari ilin oktyabrında Malayziyanın paytaxtı Kuala-Lumpr şəhərində keçiriləcək dünya kuboku yarışına göndəriləcək.

Qeyd edək ki, “Tələbələr azad sahibkarlıq fəaliyyətində” beynəlxalq proqramının əsası 1975-ci ildə ABŞ universitetləri tərəfindən qoyulub. Hazırda 40 ölkəni təmsil edən tələbə komandaları hər il keçirilən dünya kuboku yarışlarında öz ölkələri və universitetlərini təmsil edirlər. 2006-cı ildən isə Azərbaycan komandaları da dünya kuboku yarışlarında iştirak etmək hüququnu qazanıb.

Xəyalə