Respublika Seysmoloji Xidmət Mərkəzində yubiley tədbiri keçirilib

Azərbaycan Milli Elmlər Akademiyası (AMEA) Respublika Seysmoloji Xidmət Mərkəzində mərkəzin keçmiş baş geoloqu, Azərbaycan Boks Federasiyasının vitse-prezidenti, Milli Olimpiya komitəsinin üzvü Ramiz Yusifovun 75 illik yubileyi münasibəti ilə tədbir keçirilib.
AMEA Respublika Seysmoloji Xidmət Mərkəzindən Lent.az-a verilən məlumata görə, tədbirdə çıxış edən AMEA Respublika Seysmoloji Xidmət Mərkəzinin baş direktoru, geologiya-minerologiya elmlər doktoru Qurban Yetirmişli Ramiz Yusifovun Azərbaycanda seysmoloji xidmət yarandığı gündən bu qurumda çalışdığını bildirib.
Qurban Yetirmişli Ramiz Yusifovun Azərbaycan seysmologiyasının inkişafındakı böyük xidmətlərindən danışıb. O, Ramiz Yusifovun həm də gözəl idmançı olduğunu xatırladıb, AMEA RSXM-ın adından diplom və hədiyyə təqdim edib. Respublika Seysmoloji Xidmət Mərkəzinin baş direktoru bu günlərdə 60 illiyi olan mərkəzin əməkdaşı Rövşən Rzayevi də təbrik edərək mükafatlandırıb. Tədbirdə AMEA RSXM-ın əməkdaşları da hər iki yubliyara ürək sözlərini və təbriklərini çatdırıblar.
Ramiz Yusifov isə keçmiş həmkarlarının ona göstərdiyi diqqəti yüksək qiymətləndirib. Azərbaycan seysmologiyasının bu gün inkişaf edən bir mərkəzə çevrildiyini bildirən Ramiz Yusifov Azərbaycan seysmologiyasının etibarlı əllərdə olduğunu qeyd edib.