Əcnəbilər də korrupsiya qanununun təsirinə düşəcək

Azərbaycanda bundan sonra xarici şirkətlər və beynəlxalq təşkilatların vəzifəli şəxsləri korrupsiya hüquqpozmalarının subyektlərinin dairəsinə daxil olunacaq. Lent.az-ın məlumatına görə, bu barədə Milli Məclisin Hüquq siyasəti və dövlət quruculuğu komitəsində müzakirə olunan Cinayət Məcəlləsinə əlavə və dəyişikliklərdə nəzərdə tutulub.

Əlavə və dəyişikliklərə dair təkliflərdə göstərilir ki, Azərbaycanın tərəfdar çıxdığı BMT-nin korrupsiyaya qarşı Konvensiyasında, Avropa Şurasının cinayət və mülki məsuliyyət haqqında konvensiyalarında beynəlxalq təşkilatların və xarici şirkətlərin maddi-məsul şəxsləri korrupsiya hüquqpozmalarının subyekti hesab olunur. Hazırda Azərbaycanın cinayət və inzibati qanunvericiliyinin beynəlxalq qanunvericiliyə uyğunlaşdırılması istiqamətində işçi qrupu tərəfindən iş aparılır, bu məqsədlə qanunvericiliyə əlavə və dəyişikliklərlə bağlı təkliflər hazırlanıb və Milli Məclisə təqdim olunub.

Qeyd edək ki, “Korrupsiyaya qarşı mübarizə haqqında” qanunda korrupsiya hüquqpozmalarının subyektlərinin dairəsi göstərilib.

Mübariz Aslanov