BDU-da Gül bayramı keçirilib

Bu gün Bakı Dövlət Universitetinin Tələbə Gənclər Təşkilatının təşəbbüsü və Azərbaycan Tələbə Gənclər Təşkilatları İttifaqının dəstəyi ilə Heydər Əliyevin anadan olmasının 88-ci ildönümünə həsr olunmuş Gül bayramı keçirilib. Universitetin mətbuat xidmətindən Lent.az-a verilən məlumata görə, tələbələrin hazırladıqları gül kompozisiyalarının və incəsənət nümunələrinin nümayiş etdirildiyini tədbirdə 17 fakültə, o cümlədən əksər ali təhsil müəssisələri iştirak ediblər.

Gül bayramına qatılan rektor, akademik Abel Məhərrəmov Heydər Əliyevin ad günü münasibətilə təşkil edilmiş bayramın əhəmiyyətindən danışıb, kompozisiyaların fakültələrin profilinə uyğun hazırlanmasını yüksək qiymətləndirib: “İştirakçılar ümummilli liderimizi necə təsəvvür etdiklərini göstərməyə çalışıblar. Bu tədbir onu göstərir ki, bu gün Azərbaycan gəncliyi düzgün yoldadır, gənclər ümummilli liderimizin müəyyənləşdirdiyi ideya ilə yaşayırlar. Bu da ondan xəbər verir ki, Azərbaycanın böyük, işıqlı gələcəyi var. Bu gənclər Azərbaycanın bayrağını ən yüksək zirvəyə qaldıra biləcəklər. Bizi sevindirən odur ki, gənc nəsil öz borcunu vaxtında başa düşür və vaxtında Heydər Əliyev addımları ilə irəli gedir”.

Gül bayramının növbəti illərdə daha geniş şəkildə keçirilməsinin nəzərdə tutulduğunu bildirən rektor tədbirin təşkilatçılarına, əməyi keçən hər kəsə təşəkkürünü bildirib.