Hindistanlı professor Dillər Universitetində mühazirə oxudu - FOTO

Leent.az-ın ADU-nun mətbuat xidmətinə istinadən verdiyi məlumata görə, Regionşünaslıq kafedrasının müdiri, dosent Sevdagül Əliyevanın təşkilatçılığı ilə keçirilən tədbirdə ADU-nun Beynəlxalq əlaqələr üzrə prorektoru, dosent Jalə Qəribova, Regionşünaslıq və Beynəlxalq münasibətlər fakültəsinin dekanı, dosent Məcid Əliyev, eləcə də həmin fakültənin Hindistanşünaslıq ixtisası üzrə təhsil alan II və IV kurs tələbələri iştirak edib.

Hindistanlı professor Abhijit Sen mühazirəsində Benqal ədəbiyyatı və musiqisini formalaşdıran şair, dramaturq, musiqiçi, rəssam Rabindranat Taqorun yaradıcılığından ətraflı məlumat verib. Rabindranat Taqorun qurucu yazılarına, milliyətçi ruhuna və beynəlmiləlləşmə anlayışına xüsusi önəm verdiyindən danışan A. Sen dramaturqun müasir Hindistanın qurucuları arasında güclü eklektisizminə (zidd fikirləri mexaniki birləşdirmə) görə fərqləndiyini bildirib.

R. Taqorun teatrda bir sıra müasir milli və beynəlxalq mədəni irslərin aşılanmasında rolu olduğunu vurğulayan professor buna onun həm yazılarında, həm də tamaşalarında rast gəlindiyini qeyd edib.

A. Sen “Gitanjali” poemasının müəllifi kimi Taqorun Nobel mükafatına layiq görülmüş ilk qeyri – avropalı olduğunu da bildirib. Bununla yanaşı, Taqor bir sıra hekayə, oçerk, şeir və 100-dən artıq sulu boya ilə çəkilmiş rəsmlərin müəllifi kimi də tanınır.

Sonda müxtəlif professorların Taqor haqqında söylədikləri fikirlərdən ibarət video-slayd nümayiş olunub. İştirakçılar R. Taqorun rəsm əsərlərindən ibarət sərgi ilə də tanış olublar.