“Ölkənin inkişafında İKT və mobil rabitənin rolu” - MÜSABİQƏ

Bu gün Rabitə və İnformasiya Texnologiyaları Nazirliyinin iştirakı, “Azerfon” MMC-nin dəstəyi, “Yeni Nəsil” Jurnalistlər Birliyi və Azərbaycan Jurnalistlər Birliyinin təşkilatçılığı ilə “Ölkənin inkişafında İKT və mobil rabitənin rolu” mövzusunda jurnalist müsabiqəsi elan edilib.

Lent.az-ın verdiyi məlumata görə, “Yeni Nəsil” Jurnalistlər Birliyinin sədri Arif Əliyev deyib ki, müsabiqənin məqsədi informasiya və kommunikasiya texnologiyaları (İKT) xüsusən də mobil rabitə sahəsində əhalinin maarifləndirilməsi, İKİ sektorunda yeni inkişaf imkanlarının araşdırılması, eyni zamanda medianın texniki və iqtisadi dayaqlarının möhkəmləndirilməsinə yardım göstərməkdir.

Arif Əliyev bildirib ki, bu müsabiqə dövlət qurumları, özəl sektor və ictimai təşkilatların ölkənin inkişafı istiqamətində birgə əməkdaşlığının nümunəsidir. Azərbaycanın dövlət müstəqilliyinin 20 illik yubileyinə həsr edilmiş müsabiqədə çap və elektron media nümayəndələri iştirak edə bilərlər. Müsabiqə 1 ay müddətində davam edəcək. Müsabiqəyə aşağıdakı mövzularda materiallar qəbul olunacaq:

- Mobil rabitə sahəsində yeni imkanlar;

- Mobil rabitə xərclərinə necə qənaət etməli;

- Mobil rabitədə şəffaflıq;

- Nömrə daşınması layihəsi – müştərilər üçün üstünlüklə;

- Medianın inkişafında mobil rabitədən istifadə;

- İnternetə çıxışın genişləndirilməsində mobil rabitənin rolu;

- Sosial inkişaf üçün mobil rabitədən istifadə;

- Azərbaycanda İKT sahəsinin inkişafında mobil rabitənin rolu;

- Rouminq mobil rabitənin əsas xassələrindən biri kimi.

Müsabiqənin qalibləri Rabitə və İnformasiya Texnologiyaları Nazirliyi, “Azerfon”, Yeni Nəsil Jurnalistlər Birliyi və Azərbaycan Jurnalist Birliyinin nümayəndələrindən ibarət ekspertlər komissiyası tərəfindən müəyyən olunacaq.

Müsabiqə nəticəsində 5 qalib seçiləcək. Müsabiqədə birinci yerin qalibi 500 manat mükafat alacaq. İkinci yeri tutan 2 nəfərin hər b irinə 300 manat, üçüncü yeni tutan 2 nəfərin hər birinə 200 manat mükafat veriləcək. 5 nəfər üçün xüsusi mükafat ayrılıb. Xüsusi mükafatın məbləği 100 manatdır.