Bakıda dəmiryolçuların həmkarlar təşkilatlarının beynəlxalq toplantısı keçirilir

Lent.az-ın məlumatına görə, tədbir iştirakçıları əvvəlcə Fəxri Xiyabanda Heydər Əliyevin məzarını və Şəhidlər Xiyabanını ziyarət ediblər. Bir neçə dövlətdən yüksək səviyyəli qonaqların iştirakı ilə təşkil olunan iclası Dəmiryolçuların və Nəqliyyat İnşaatçılarının Həmkarlar İttifaqları Beynəlxalq Konfederasiyasının baş Katibi Gennadi Kosolapov açıb. Daha sonra Azərbaycan Dəmir Yolları QSC-nin sədr müavini Qurban Nəzirov çıxış edib. O, Azərbaycanda bu istiqamətdə görülən işlər və qəbul olunmuş dövlət proqramı barədə geniş və ətraflı məlumat verib.

Q.Nəzirov dəmiryolçuların sosial şəraitinin yaxşılaşdırılması və digər istiqamətlərdə, həmçinin peşə təhlükəsizliyinin təminatında xeyli iş görüldüyünü bildirib.

Yığıncaqda, həmçinin Azərbaycan Dəmiryolçularının Müstəqil Həmkarlar İttifaqı Respublika Komitəsinin sədri Fəzail Bağırov da iştirak edir.

Qeyd edək ki, iclas bir neçə gün davam edəcək. Qonaqlar Bakının tarixi memarlıq nümunələri ilə tanış olacaqlar və ölkənin şimal bölgəsinə səfər edəcəklər.