Binəqədidə I rübün yekunlarına dair iclas keçirilib - FOTO

RİH ictimai təşkilatlar və siyasi partiyalarla iş şöbəsinin müdiri Natiq Əliyevin Lent.az-a verdiyi məlumata görə, rayonun idarə, təşkilat və müəssisələrinin rəhbərlərinin, eləcə də ictimaiyyət nümayəndələrinin iştirakı ilə keçirilən iclası giriş sözü ilə açan RİH başçısı Alı Qocayev 2011-ci ilin I rübü ərzində ölkənin sosial-iqtisadi, ictimai-siyasi, mədəni və s. sahələrdə əldə olunan uğurlardan danışıb. A.Qocayev aprelin 12-də Nazirlər Kabinetinin məlum iclasında dövlət başçısı İlham Əliyevin proqram xarakterli nitqinin bəzi məqamlarına toxunaraq, keçən dövr ərzində ölkə üzrə nailiyyətlərin əldə olunmasında Binəqədi rayonunun da özünəməxsus yeri olduğunu diqqətə çatdırıb.

RİH başçısının müavini Vüsal İsmayılov 2011-ci ilin I rübündə rayonun sosial-iqtisadi inkişafı istiqamətində görülən işlər haqqında məruzə ilə çıxış edib.

Məruzə ətrafında çıxış edən Biləcəri bələdiyyəsinin sədri İlham Xəlilov, DSMF-nin Binəqədi rayon şöbəsinin müdiri Nizami Məhərrəmov və digər natiqlər hesabat dövrü ərzində ölkə üzrə əldə olunmuş uğurları, Prezident İlham Əliyevin Azərbaycanın sosial-iqtisadi inkişafının daha da sürətləndirilməsi məqsədilə həyata keçirdiyi tədbirləri yüksək qiymətləndiriblər.

Sonda təkliflər də nəzərə alınmaqla iclasın qərar layihəsi oxunub.