Azərbaycanda şəkərli diabet hüceyrələrini məhv edən qida məhlulu ixtira olunub

Şəkərli diabet hüceyrələrini məhv edən mürəkkəb biokimyəvi və biofiziki xüsusiyyətə malik AÇZP tərkibli yeni vitamin birləşməsi olan qida məhlulu ixtira olunub.

“Nizami A.S” Kiçik Müəssisəsinin nəzdindəki elmi-təcrübə sınaq laboratoriyasının baş texnoloqu, ixtiraçı Çimnaz Əliyeva Lent.az-a bildirib ki, yeni AÇZP vitamin birləşməsi hormon və fermentlərə xarakterik, neon xüsusiyyətli özünəməxsus forma və xüsusiyyətləri olan müstəqil kimyəvi məhluldur. Onun sözlərinə görə, bu qida məhlulunun üzərində 1988-ci ildən işlənməyə başlanıb. 1999-cu ildən isə laboratoriya şəraitində intensiv sınaqlar aparılıb və 2004-cü ildən dövlət qeydiyyatından keçərək sertifikatlaşdırılıb. Bu məhlul 2008-ci ildə “Nizami A.S” Kiçik Müəssisəsinin nəzdində elmi-təcrübə sınaq laboratoriyasında sınaqdan keçirilib. Hazırda bu istiqamətdə araşdırmalar davam edir.

Çimnaz Əliyeva onu da bildirib ki, ixtira sənədləri Standartlaşdırma, Meteorologiya və Patent üzrə Dövlət Komitəsinə təqdim olunub.