Bahalaşmanı rəsmi statistika da təsdiqlədi

Dövlət Statistika Komitəsi 2011-ci ilin fevral ayında satılmış kənd təsərrüfatı məhsullarının istehsalçı qiymətlərinin dəyişməsi üzrə göstəriciləri açıqlayıb.

Komitədən Lent.az-a bildiriblər ki, ötən ay bitkiçilik və heyvandarlıq məhsullarının istehsalçı qiymətləri əvvəlki ayla müqayisədə 2,5 faiz bahalaşıb. Belə ki, nar 3,6 faiz, alma 8,2 faiz, armud 3,2 faiz, limon 4,4 faiz, şabalıd 0,2 faiz, fındıq 5,1 faiz, qoz 11,1 faiz, göyərti 1,6 faiz, balqabaq 12,2 faiz, baş soğan 1,5 faiz, kartof 8,8 faiz, artıb. Buğdanın qiyməti isə 2,6 faiz ucuzlaşıb.

Komitənin hesablamalarına görə, fevral ayında camış südü 2,2 faiz, diri qoyun və keçilər 1,6 faiz, yumurta 43,0 faiz bahalaşıb. Diri ev quşlarının 7,5 faiz, inək südünün 2,7 faiz, qırxılmış yuyulmamış yununun qiymətləri isə 0,1 faiz ucuzlaşıb. Ötən ay həmçinin diri balığın qiymətlərində 1,1 faiz ucuzlaşma müşahidə olunub.

Elxan SALAHOV