Dindarlar Fəxri Xiyabanı ziyarət edib

Bakıda keçiriləcək “Dinlərarası dialoq” mövzusundakı beynəlxalq konfransa müxtəlif dinlərin nümayəndələri qatılacaq

Bu gün Qafqaz Müsəlmanları İdarəsinin sədri, şeyxülislam Hacı Allahşükür Paşazadə, Dini Qurumlarla İş üzrə Dövlət Komitəsinin sədri Hidayət Orucov, habelə Belorus patriarxı “Dinlərarası dialoq” mövzusunda Bakıda keçiriləcək beynəlxalq konfransın iştirakçıları ilə birgə Fəxri Xiyabanda Heydər Əliyevin qəbrini ziyarət ediblər.

Lent.az-ın məlumatına görə, Hacı Allahşükür Paşazadə jurnalistlərə açıqlamasında bildirib ki, konfransın əsas məqsədi dünya dindarlarının birlik nümayiş etdirməsidir. Onun sözlərinə görə, dünyanın diqqətində olan müəyyən məsələlər var ki, dindarlar onların sülh yolu ilə həll etməyin tərəfdarıdır: “Konfransın məqsədlərində biri də məhz dindarların bu mövqeyini dünyaya nümayiş etdirməkdir. Dindarlar istəyirlər ki, bu məsələlərdə siyasətçilərə gömək edək”.

Şeyx deyib ki, tədbirdə müxtəlif dinlərin nümayəndələri iştirak edir və onların Bakıya gəlişi Azərbaycanın tolerant ölkə olduğunu bir daha sübut edir.

Pərvin Abbasov