İmtahan rekordçuları ilə görüş

TQDK qəbul imtahanlarında 600-dən çox bal toplamış abituriyentləri cəmiyyətə tanıdacaq

Sabah Tələbə Qəbulu üzrə Dövlət Komissiyasında (TQDK) ali məktəbələrə qəbul imtahanlarında 600-dən çox bal toplamış abituriyentlərin bir qrupu ilə görüş keçiriləcək. I ixtisas qrupu üzrə imtahanlarda ən yüksək nəticə göstərmiş abituriyentlərin arzu və istəkləri, onların imtahan prosesinə dair fikirləri öyrəniləcək.

TQDK-dan Lent.az-a bildiriblər ki, bu il I ixtisas qrupunda 600-dən çox bal toplamış abituriyentlər arasında Dövlət İqtisad Universitetinə qəbul olunanlar çoxluq təşkil edir. Belə ki, bu qrupda 600-dən yuxarı bal toplamış abituriyentlərin 66-sı həmin universitetin payına düşür. Sonrakı yerlərdə Bakı Dövlət Universiteti, Azərbaycan Dövlət Neft Akademiyası, Qafqaz Universiteti, Xəzər Universiteti gəlir.

Komissiyada deyirlər ki, 600-dən çox bal toplamış abituriyentlərlə belə görüşlər hər bir qrup üzrə ayrı-ayrılıqda keçiriləcək. Belə ki, avqustun 19-da II, avqustun 20-də III, avqustun 21-də isə IV qrupda 600-dən çox bal toplayanlar TQDK-ya dəvət olunacaq. Məqsəd imtahanda yüksək nəticə göstərmiş abituriyentləri cəmiyyətə çatdırmaq və onların təcrübəsini məktəblilər arasında təbliğ etməkdir.

Elxan SALAHOV