Azərbaycanda yeni mədrəsələr və “Quran” kursları açılacaq

Bunun üçün həmin dini təhsil müəssisələrinin öz əsasnaməsi olmalıdır

“İndiyədək heç bir məscid sökülməyib. Sökülənlər, sadəcə, qanunsuz tikililərdir”.

Lent.az-ın məlumatına görə, Dini Qurumlarla İş üzrə Dövlət Komitəsinin sədri Hidayət Orucov Qafqaz Müsəlmanları İdarəsinin XII qurultayında belə deyib. Onun sözlərinə görə, bəzi rayonların icra başçıları əvvəllər məscid üçün binaların tikintisinə dair səhv qərarlar verib. İndi isə həmin rayonların icra başçıları dəyişib və yeni gələnlər əvvəlkilərin səhvlərini düzəldir.

Bununla belə, komitə sədri bəzi məmurların dinə və din xadimlərinə qarşı qanunsuz hərəkətə etdiklərini də gizlətməyib: “Hamı bilməlidir ki, məscidlərə və ya dini icmalara bağlı məsələlərlə məşğul olan bir dövlət orqanı var ki, bu da Dini Qurumlarla İş üzrə Dövlət Komitəsidir. Biz bu sahədə Qafqaz müsəlmanları İdarəsinin rəhbərliyi ilə qarşılıqlı əlaqədə istənilən qərarı verə bilərik”.

Hidayət Orucov onu da bildirib ki, bundan sonra ölkədə məscid tikintisi, hətta mövcud ibadət ocaqlarının təmiri məsələsi Qafqaz Müsəlmanları İdarəsinin yeni redaksiyada qəbul olunan nizamnaməsi əsasında həll ediləcək. O, qeyd edib ki, yeni nizamnamədə bu məsələlərin qanuni yolları açıq şəkildə əks olunub.

Komitə sədri bundan sonra mədrəsə və “Quran” kurslarının da açılmasına icazə veriləcək: “Qafqaz Müsəlmanları İdarəsinin nizamnaməsinə əlavə və dəyişikliklərdə mədrəsə və “Quran” kursları barədə ayrıca müddəa var. Bu müddəa yeni mədrəsələrin, “Quran” kurslarının açılmasını nəzərdə tutur. Orada göstərilir ki, mədrəsə və “Quran” kurslarının da öz əsasnaməsi olmalıdır”.

Elxan SALAHOV