Xocalı soyqırımının qurbanları 30-dan çox ölkədə anılacaq - SİYAHI

Aksiyalar təşkil olunacaq, dəyirmi masa, konfranslar keçiriləcək

Xocalı soyqırımının növbəti ildönümü ilə əlaqədar dünyanın bir sıra ölkələrində faciə qurbanlarının xatirəsi anılır, qətliamın dünya ictimaiyyətinə tanıdılması və qəbul etdirilməsi istiqamətində müxtəlif tədbirlər keçirilir.

Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, bəzi ölkələrdə Azərbaycan diasporunun və səfirliklərin xətti ilə Xocalı qətliamının 21-ci ildönümünə həsr olunmuş tədbirlərə artıq start verilib. Bu il ABŞ, Kanada, Latın Amerikası ölkələri, Avstraliya və yeni Zelandiya da daxil olmaqla, dünyanın 30-dan çox ölkəsində Xocalı faciəsinin qurbanları yad edilir. Fevralın 14-də Almaniyanın paytaxtı Berlində Xocalı soyqırımına həsr olunmuş dəyirmi masa, konfrans keçirilib. Fevralın 20-də Misirin paytaxtı Qahirədə Xocalı faciəsinə həsr edilmiş sənədli filmlərin nümayişi olub. Ukraynanın paytaxtı Kiyevdə fevralın 18-22-dək soyqırımla əlaqədar qanvermə aksiyası başlayıb. Fevralın 25-də isə Ukrayna paytaxtında BMT və ATƏT nümayəndəliyi önündə mitinq keçirilməsi nəzərdə tutulur. Ölkənin Odessa, Dnepropetrovsk, Poltava, Luqansk, Nikolayev, Vinnick, Donetsk, Lvov, Sevastapol şəhərlərində fevralın 26-dək Xocalı soyqırımının 21-ci ildönümü ilə bağlı dəyirmi masa, anım mərasimi, konfransların təşkil olunacaq.

ABŞ-ın Los Anceles şəhərindəki təhsil ocaqlarında fevralın 19-dan Xocalını anım həftəsi başlayıb. 20-ci əsrin insanlıqdan uzaq cinayəti – Xocalı qurbanlarının xatirəsinə həsr olunmuş anım mərasimləri ABŞ-ın Vaşinqton, Hyuston, Mayami, San-Fransisko, San- Xose, Los-Anceles kimi şəhərlərində təşkil olunacaq. Fevralın 26-da isə Nyu-Yorkda BMT-nin mənzil-qərargahı qarşısında etiraz aksiyası planlaşdırılır. Həmin gün, həmçinin, Nyu-Yorkda “Pax Turcica” sistemi vasitəsi ilə Türk və Azərbaycan icma üzvləri tərəfindən müfaviq yerli və federal orqanlara Xocalı soyqırımının tanınması məqsədi ilə məktubların göndərilməsi nəzərdə tutulub. Fevralın 26-da Kanadanın Toronto, Monreal, Hamilton, Vankuver şəhərlərində də Xocalı soyqırımının qurbanlarının xatirəsinə həsr olunmuş tədbirlər keçiriləcək.

Sabahdan, fevralın 21-dən başlayaraq Türkiyənin İzmir, İstanbul, Əskişəhər, Adana, Yalova kimi şəhərlərində Xocalı mövzusunda konfranslar, fotosərgi və yürüş təşkil olunacaq. Fevralın 26-da Ankarada Xocalı soyqırımının 21-ci ildönümü ilə bağlı Əskişehir Azərbaycanlılar Dərnəyinin beş nəfərlik nümayəndə heyətinin Türkiyə Azərbaycan Dərnəkləri Federasiyasının (TADEF) nümayəndə heyəti ilə birlikdə Türkiyə Böyük Millət Məclisi nümayəndələri ilə görüşü olacaq.

Gürcüstanda “Xocalı ayı” çərçivəsində fevralın 26-dək ölkənin Kvemo-Kartli bölgəsində və paytaxt Tbilisidə Xocalı qətliamına həsr olunmuş kitablar, foto-audio materiallar, sənədli və bədii filmlər nümayiş etdiriləcək. Fevralın 26-da Tbilisinin mərkəzi küçələrində yürüş təşkil olunacaq. Xocalı qətliamının qurbanları Almaniyada da yad ediləcək. Berlin, Hannover, Hamburq, Frankfurt, Drezden, Potsdam də fevralın 22 və 23-də anım mərasimləri fotosərgi, konfrans və etiraz aksiyasının keçirilməsi nəzərdə tutulur. Maqdeburq şəhərində isə Xocalı soyqırımına həsr olunmuş avtomobil yürüşünün təşkili planlaşdırılır. Fevralın 26-da Berlində soyqırımın 21-ci ildönümü ilə bağlı etiraz aksiyası keçiriləcək.

İsveçin paytaxtı Stokholmda isə Xocalı soyqırımının ildönümü ilə bağlı etiraz aksiyasının keçirilməsi isə fevralın 23-də baş tutacaq. Belarusun paytaxtı Minskdə də fevralın 23-də Xocalı faciəsinə həsr olunmuş anım mərasimi, dəyirmi masa və konfransların keçirilməsi gözlənilir. Fevralın 24-də Qazaxıstanın paytaxtı Astanada və bütün vilayətlərdə Xocalı soyqırımının qurbanlarının xatirəsinə həsr olunmuş anım mərasimi və “Xocalı xatirəsi” mövzusunda elmi-praktik konfrans keçiriləcək. Rusiyada Xocalı soyqırımının təbliği məqsədilə Ümumrusiya Azərbaycanlıları Konqresinin (ÜAK) saytında, mətbu orqanı “ Azerbaydjanskiy Konqres” qəzetində və digər kütləvi informasiya vasitələrində Xocalı soyqırımının iyirmi birinci ildönümünə həsr edilmiş materialların dərci planlaşdırılıb. Fevralın 26-da Rusiya paytaxtında xatirə gecəsi təşkil olunacaq.

İsrailin paytaxtı Tel-Avivdə fevralın 25-də Xocalı soyqırımının 21-ci ildönümü ilə bağlı Tel-Aviv Universitetində foto “Justice for Khojaly” (“Xocalıya ədalət”) adlı fotosərgi olacaq. Qırğız Respublikasının paytaxtında isə Türk Manas Universitetində Xocalı faciəsi Vahid Mustafayevin “Xoca” filmi ilə anılacaq. Meksikada, Belçikanın paytaxtı Brüsseldə, Niderlandın paytaxtı Amsterdamda, Rotterdam, Haaqa şəhərlərində, Moldovada, Danimarka, Polşa, Estoniya, Litva, Rumıniya, Çexiyada fevralın 26-da Xocalı faciəsinin qurbanları anılacaq, dəyirmi masa və konfranslar keçiriləcək.