600-dən çox Azərbaycanlı qaçqın Ermənistana qarşı birgə iddia qaldırıb

Avstriyanın “Lansky, Ganzger&Partner” və Azərbaycanın Bakı Hüquq Mərkəzi (BHM) birgə hüquq müəssisəsi yaratmaq haqqında sərəncam imzalayıb. Lent.az-ın məlumatına görə, bu barədə “Lansky, Ganzger&Partner” beynəlxalq hüquq şirkətinin direktoru Qabriel Lanski bildirib.

Yeni qurumun adı “BHM Lansky, Ganzger&Partner MMC”-dir. Lanski bildirib ki, xarici investorlara xidmət göstərməklə “BHM Lansky, Ganzger&Partner MMC” müştərilərə regional bazarlara giriş imkanı yaradacaq.

Lanski Azərbaycan universitetlərindən birinin hüquq fakültəsi ilə Vyana universitetinin eyniadlı fakültəsi arasında mübadilə proqramı hazırlamağı planlaşdırdıqlarını bildirib.

BHM-in direktoru Anar Bağırov isə bildirib ki, Azərbaycandan olan qaçqın və məcburi köçkünlərinin kütləvi şəkildə (600-dən çox) Ermənistan dövlətinə qarşı Avropa İnsan Haqları Məhkəməsində qaldırdığı iddia ərizələrinin hazırlanmasında “Lansky, Ganzger&Partner”-nin icraçı direktoru birbaşa köməklik edib.

“Biz təkcə kommersiya deyil, həm də ictimai fəaliyyətlə məşğuluq” – deyə, A.Bağırov bildirib.

Pərvin ABBASOV