BBP “erməni açlımı”na dəstək vermədi

Davudoğlu Topçuyla görüşdən əliboş döndü
Türkiyənin xarici işlər naziri Əhməd Davudoğlu bu gün ziyarət etdiyi Böyük Birlik Partiyasının (BBP) sədri Yalçın Topçudan “erməni açılımı”na dəstək ala bilməyib.
Lent.az-ın Türkiyənin NTV telekanalına istinadən verdiyi məlumata görə, Yalçın Topçu görüşdən sonra verdiyi açıqlamasında deyib ki, Ərdəhandan Ədirnəyə qədər türk xalqına səslənir və türk millətinin kürəyini AKP-nin yeni “açlımı”ndan qorumağa çağırır.
BBP sədri hesab edir ki, Ermənistanla diplomatik münasibətlərin quruması, sərhədlərin açılması ilə bağlı protokollar ABŞ-ın tələbləriylə gündəmə gətirilib: “Ermənistan Qarabağda işğal etdiyi torpaqlardan çəkiləcəyini bəyan etməli, Xocalı soyqırmı mütləq o protokolda əksini tapmalıdır. Əgər İsveçrədə bir nəfər desə ki, “erməni soyqırımı” yalandır, onu dərhal həbsə atarlar”.
Yalçın Topçu vurğulayıb ki, İsveçrədə oturub belə bir protokola imza atmaq yanlışdır: “Bu məsələlər mütləq Azərbaycanın iştirakıyla müzakirə olunmalıdır. Bunu Əhməd Davudoğluna da söylədim. Baş nazir Rəcəb Tayyib Ərdoğanın “Ermənistan Qarabağda işğal etdiyi torpaqlardan geri çəkilməzsə, biz sərhədləri açmayacağıq” sözlərinə türk milləti inanmaq istəyir. AKP üslubda səhvə yol verdi. Protokollar bu mərhələyə gəlməmişdən əvvəl parlamentdə müzakirə olunmalı idi. Ancaq inanıram ki, millət vəkilləri protokollar müzakirə çıxarılarkən türk millətinin mövqeyini ifadə edəcəklər”.
BBP sədri qeyd edib ki, Ermənistan hər şeydən əvvəl Qars anlaşmasını tanımalı, soyqırım iddialarından vaz keçməlidir: “Biz xarici işlər nazirinə də qırmızı xətlərimizi açıqladıq”.