Azərbaycanın 2 naziri Ermənistandadır

Onlar artıq Ermənistanın hökumət nümayəndələri ilə müqavilə də imzalayıblar

Azərbaycanın Gənclər və İdman Naziri Azad Rəhimov və Cüdo Federasiyasının prezidenti Füzuli Ələkbərov artıq Ermənistandadır. Onlar qonşu və düşmən ölkədə keçiriləcək gənclər arasında Avropa çempionatında azərbaycanlı idmançıların iştirak etmələri üçün təşkilati məsələlərin müzakirəsi məqsədilə bir neçə gün Yerevana yola düşüblər.

Gənclər və İdman Nazirliyinin mətbuat xidmətindən Lent.az-a bildiriblər ki, Azad Rəhimov, onun erməni həmkarı Armen Qriqoryan , Füzuli Ələkbərov və Ermənistan Cüdo Federasiyasının Prezidenti Aleksan Avetisyan , habelə Avropa Cüdo Federasiyası və Avropa Olimpiya Komitəsi İcraiyyə Komitəsinin üzvləri arasında müqavilə imzalanıb. Müqaviləyə Azərbaycan idmançılarının Ermənistana daxil olduqları andan ölkəni tərk edəcəkləri günə qədər ev sahibliyi edən ölkənin bütün təhlükəsizlik məsələlərinə ciddi şəkildə cavabdeh olması, informasiyaların ötürülməsi üçün şəraitin yaradılması, məşqlərin mütəmadi keçirilməsi, Azərbaycan bayrağının yarış boyu digər ölkələrin bayraqları ilə bir sırada asılması, idmançımızın 1-ci yeri qazanacağı təqdirdə Azərbaycan bayrağının qaldırılması və himninin səsləndirilməsi və bütün iştirkaçıların bu an ayağa qalxması, BOK tərəfindən səlahiyyətli jurnalistlərin sərbəst şəkildə iştirakının təmin edilməsi, yarış boyu internet xidmətlərindən rahat yararlanma və digər məsələlər daxildir.

Elxan SALAHOV