“Azərbaycan bu “status-kvo” ilə heç vaxt razılaşmayacaq”
08 iyul 2009 22:30 (UTC +04:00)

“Azərbaycan bu “status-kvo” ilə heç vaxt razılaşmayacaq”

Bunu xarici işlər naziri Elmar Məmmədyarov deyib

“Dağlıq Qarabağ problemi çox vacib və çətin məsələdir. Erməni həmkarımla mütəmadi olaraq görüşlər keçirib, müzakirələr aparırıq. Nizamlanmanın detallarını müzakirə edib, prezidentlərin görüşünü hazırlayırıq. Praqa prosesi başlanandan keçən beş il ərzində çox nailiyyət əldə etməmişik. Mövqelərin yaxınlaşmasında hələ ki, çətinliklər var. Amma əsas odur ki, danışıqlar irəliyə gedir”.

APA-nın xəbərinə görə, bu sözləri Azərbaycanın xarici işlər naziri Elmar Məmmədyarov “Azərbaycan qlobal siyasətdə: Xarici siyasətin formalaşması” mövzusunda keçirilən beynəlxalq konfransda bildirib: “Çox istərdim deyəm ki, bu danışıqlar heç olmasa, orta sürətlə gedir. Amma etiraf etməliyəm ki, çox ləng gedir”.

Nazir deyib ki, Azərbaycan danışıqları davam etdirmək niyyətindədir: “Azərbaycanın mövqeyi dəyişməz olaraq qalır. Ermənistan Silahlı Qüvvələri işğal etdiyi ərazilərdən çıxmalı, torpaqlar azad olunmalı, məcburi köçkünlər doğma yurdlarına qayıtmalı, bundan sonra Dağlıq Qarabağın statusu məsələsinə baxılmalıdır. Dağlıq Qarabağ problemi ilə bağlı hazırkı “status-kvo”su qeyri-kafidir, bunu Ermənistan özü də başa düşür. Azərbaycan bu “status-kvo” ilə heç vaxt razılaşmayacaq”.
# 666

Oxşar yazılar