“Müxalifətdə ciddi keyfiyyət dəyişikliklərinə ehtiyac var”

Lent.az-ın məlumatına görə, bunu jurnalistlərə açıqlamasında Yeni Azərbaycan Partiyasının icraçı katibi Əli Əhmədov deyib. O qeyd edib ki, son parlament seçkilərində müxalifətin uğur qazana bilməməsi, müxalifətdaxili proseslərin düzgün qurulmaması, istiqamətlərin düzgün müəyyən edilməməsinin nəticəsidir: “Bu səbəbdən də biz hesab edirik ki, müxalifətdə ciddi keyfiyyət dəyişikliklərinə ehtiyac var. Biz də istərdik ki, Azərbaycanda güclü, normal sivil qaydada fəaliyyət göstərə bilən müxalifət olsun”.

Əli Əhmədov jurnalistlərin müxalifət dairələrinin Milli Məslisə alternativ xalq məclisinin yaradılması barədə sualı da cavablandırıb. O bildirib ki, xalq məclisi yaradılması ideyası cəfəngiyatdır. Onun sözlərinə görə, indiki şəraitdə xalq məclisinin yaradılması heç bir reallığa söykənmir: “Biz belə hesab edirik ki, əgər müxalifətin bu ideyası normal, mövcud həqiqətlərə, reallığa söykənən bir ideya olsaydı, o zaman xalq parlament seçkilərində müxalifətin heç olmasa, bir neçə namizədinə səs verərdi. Buna görə düşünürəm ki, bu ideya da özünü doğrultmur. Belə bir xalq məclisinin yaradılması indi Azərbaycan şəraitində mümkün deyil”.

Elxan Salahov