Xeyli Azərbaycan vətəndaşı Dubayın “qara siyahı”sına düşüb

Onlara viza verilmir və Dubaya buraxılmırlar

Xeyli sayda Azərbaycan vətəndaşının adı Dubay hökumətinin “qara siyahısı”na düşdüyündən, onlara Dubay Əmirliyi tərəfindən viza verilmir. Lent.az-ın məlumatına görə, bu barədə Azərbaycanda fəaliyyət göstərən “Smart Holiday” turizm şirkətinin direktoru İlqar Babayev Dubaydan gələn qonaqlarla jurnalistlərin görüşündə bildirib.

O deyib ki, bu problem Azərbaycandakı eyni ad və soyadı daşıyan şəxslərlə bağlı yaranır: “Təsəvvür edin ki, ümumvətəndaşlıq pasportunu yenicə alan, heç vaxt Dubayda olmayan şəxslər heç bir səbəb olmadan “qara siyahı”ya düşüblər. Yeganə səbəb həmin ad və soyadda Azərbaycanda başqa şəxslərin də olmasıdır. Halbuki “qara siyahı”ya məsələn, Dubayda hansısa qəza, hadisə törətmiş şəxslər düşməlidir. Keçən il Yevlax sakini olan 4 nəfər şəxs Dubayda şuba oğurladığına görə həbs olundu. Onlar təbii ki, “qara siyahı”ya da düşdülər. Ancaq səbəbsiz yerə “qara siyahı”ya düşən şəxslərə bu, pis təsir edir. İndiyədək təxminən 50 müştərimə viza verilməyib. Səbəb isə heç nədən “qara siyahı”ya düşmələri olub”.

Bakıda səfərdə olan Dubay Aeroportunun birinci terminalının direktoru Valid Əhməd isə deyilənlərə münasibət bildirib. O deyib ki, bu problem birbaşa Dubaydan viza alan şəxslərlə bağlı yaranmır: “Ona görə ki, həmin şəxslər viza açdırmaq istəyərkən bütün məlumatlarını göndərirlər. Deyilən problem yalnız turizm şirkətləri vasitəsilə viza almaq istəyənlərlə bağlı yaranır. Belə ki, turizm şirkətləri viza almaq istədikləri şəxsin bütün məlumatlarını göndərmirlər”.

Valid Əhməd Dubay hökumətinin “qara siyahı”sına düşmüş Azərbaycan Respublikası vətəndaşlarının sayını bilmədiyini də deyib: “Bu işlə polis məşğul olur”.

“Smart Holiday” turizm şirkətinin direktoru İlqar Babayev isə deyilənlərlə razılaşmayıb: “Biz bütün məlumatları göndərəndə də viza ala bilmirik”.

Pərvin ABBASOV