Prezident İlham Əliyev Ərdoğanla görüşüb
07 iyun 2010 10:30 (UTC +04:00)

Prezident İlham Əliyev Ərdoğanla görüşüb

Yarım saatlıq görüşdən sonra dövlət başçısı və baş nazir Azərbaycanla Türkiyə arasında qaz müqaviləsinin imza mərasiminə qatılıblar

Asiyada Əməkdaşlıq və Etimad Artırıcı Tədbirlər Konfransı üçüncü dövlət və hökumət başçıları sammitində iştirak etmək üçün Türkiyəyə gələn Azərbaycan prezidenti İlham Əliyev bu gün İstanbulda baş nazir Rəcəb Tayyib Ərdoğanla bir araya gəlib.
Lent.az-ın “trt.net.tr” saytının Azərbaycan versiyasına istinadən verdiyi məlumata görə, "Çırağan" Sarayında baş tutan görüş yarım saata yaxın davam edib.

Görüşdən sonra Ərdoğan və Əliyev birlikdə Azərbaycan və Türkiyə arasında qaz sazişinin imzalanacağı Mabeyn salonuna eniblər və imza mərasiminə qatılıblar. Salonda qaz ticarətinə dair iki anlaşma imzalanıb.
Türkiyənin enerji və təbii sərvətlər naziri Taner Yıldızla Azərbaycanın sənaye və energetika naziri Natiq Əliyev Azərbaycandan Türkiyəyə təbii qaz satışına dair deklarasiyaya və Azərbaycana aid qazın Türkiyəyə və Türkiyə üzərindən Avropaya satışını nəzərdə tutan müqaviləyə imza atıblar.

Bundan əlavə Türkiyə tərəfindən BOTAŞ baş direktoru Fazil Şenel, Azərbaycan tərəfindən isə Dövlət Neft Şirkətinin prezidenti Rövnəq Abdullayev də təbi qazın satışına və daşınmasına dair müqavilə imzalayıblar.
İmza mərasimindən sonra nazirlər mətbuata açıqlama veriblər.
# 303

Oxşar yazılar