Hollandiyada “Azərbaycan cüdosu gunu” keçirilib

Aprelin 23-də Niderlandın Margraten bələdiyyəsinin ərazisində “To-Zai” cüdo klubunda “Azərbaycan cüdosu gunu” kecirilib. Bu barədə Lent.az-a tədbirin təşəbbüsçüsü, Hollandiyada fəaliyyət göstərən “Vahid, Bölünməz və Demokratik Azərbaycan Uğrunda Birlik” Cəmiyyətinin sədri İradə Uluxanlı məlumat verib.

Tədbirin keçirilməsində məqsəd Azərbaycanın idman sahəsində əldə etdiyi nailiyyətləri Hollandiya ictimaiyyətinə çatdırmaq olub.

Mərasimin açılışında klubun rəhbəri Erik Klaessens (cüdo ustası, 4-cü dan qara kəmər) Azərbaycan idmançılarının əldə etdiyi uğurlardan bəhs edərək, onları alqışlayıb.

Onun çıxışının ardınca Azərbaycanın tarixi, ədəbiyyatı, müasir, ictimai-siyasi durumu, işğal olunmuş ərazilərindən bəhs edən çeşidli ədəbiyyat klubun fonduna təqdim edilib.

Sözügedən cüdo klubunun 10 yaşlı azərbaycanlı üzvü Cavidan Qasımov Azərbaycanı olimpiya oyunlarında təmsil etmiş çempion cüdoçularımız Elnur Məmmədli, Elman Qasımov və başqaları haqda klub üzvlərinə məlumat verib.

“To-Zai” klubu da öz növbəsində Azərbaycana və onun idmançılarına olan maraqdan danışıb, gələcəklə əməkdaşlıq etmək arzusunda olduqlarını bildiriblər. Dostluq rəmzi olaraq, Azərbaycan cüdoçularına yadigar hədiyyələr göndəriblər.

Sonra klubun idmançıları Azərbaycan və Hollandiya bayraqları ilə bəzədilmiş salonda xatirə şəkli çəkdiriblər.

Tədbirin sonunda holland cüdoçularına içində Azərbaycan bayrağı həkk olunmuş saatlar və respublikamızı xatırladan hədiyyələr təqdim olunub.

Sədrəddin Soltan