İslam Konfransı Təşkilatı Ermənistanı bir daha işğalçı elan etdi

Uqandanın paytaxtı Kambala şəhərində keçirilən İslam Konfransı Təşkilatı (İKT) Parlamentinin növbəti sessiyasında iştirak etmək üçün Azərbaycandan millət vəkilləri VHP sədri Sabir Rüstəmxanlı və Cavanşir Paşazadə artıq yanvarın 24-dən bu ölkədə səfərdədirlər. Sabir Rüstəmxanlının Kambala şəhərindən Lent.az-a verdiyi məlumata görə, İKT Parlamentinin Siyasi və İqtisadiyyat Komitəsinin 2 gün davam edən iclasında millət vəkillərimiz Azərbaycanla bağlı iki qətnamənin qəbuluna nail olublar. Bunlardan biri Dağlıq Qarabağın Ermənistan Respublikası tərəfindən işğalı; ikincisi isə İslam Konfransı gənclər təşkilatının işi və Xocalı Soyqırımının bütün dünyada tanıtdırılmasıdır.

S.Rüstəmxanlının bildirdiyinə görə, qətnamələrin İKT-nın 6-cı sessiyasında qəbul olunması yönündə işlər aparmaq niyyətilə Azərbaycan nümayəndə heyəti İKT-yə daxil olan digər ölkələrin nümayəndə heyətləri, parlament sədrlərilə görüşlər keçiriblər. Həmçinin İslam Konfransı Təşkilatı Parlamentinin sədri Mahmud Qılıcla bir neçə görüş keçirən Sabir Rüstəmxanlı İKT-nin yanvarın 30-31-də keçiriləcək 6-cı sessiyasında Siyasi və İqtisadiyyat komitəsinin qəbul etdiyi hər iki sənədlərin müzakirəsinə hazırlaşırlar.

Hazırda Azərbaycan nümayəndə heyətinin görüşləri davam edir.