Gəncədə beynəlxalq konfrans keçirilir

Gəncədə qadınların seçici fəallığının artırılması mövzusunda 2 günlük beynəlxalq konfrans öz işinə başlayıb. Lent.az-ın Gəncəbasar müxbirinin verdiyi məlumata görə, Amerika səfirliyinin dəstəyi ilə reallaşan konfransda əsas məqsəd qarşıdan gələn seçkilərə hazırlıq, bu seçkilərdə qadınların fəallığının artırılmasına nail olmaqdır. Tədbirdə Gəncə ilə yanaşı qərb bölgəsindən 20-dən çox qadın, həmçinin Amerika, Bolqarıstan və digər dövlətlərdən nümayəndələr iştirak edib.

Tədbirdə qeyd olunub ki, Azərbaycanda qadınların mühüm sahələrdə, ümumiyyətlə cəmiyyətdə fəallığı olduqca böyük önəm daşıyır. Qadınların seçkilərdə də həm namizəd, həm seçici kimi iştirakı əhəmiyyətlidir. Əgər 2004-cü ildə keçirilən bələdiyyə seçkilərində qalib gələnlərin yalnız 3,4 % qadın olubsa, 2009-cu ilin bələdiyyə seçkisində bu göstərici 6,1 % təşkil edib. Bütün bunlarla yanaşı bəzi problemlər də qalmaqdadır.

Aparılan araşdırmaların nəticələrinə görə, hələ də bəzi qadınlar seçkiylə bağlı tam məlumatlı deyil. Bu səbəbdən maarifləndirmə işlərinin geniş vüsət almasına ehtiyac var. Analoji tədbirlərin ölkənin digər regionlarında təşkilinin nəzərdə tutulduğunu da diqqətə çatdırılıb.

Vüsalə Cənnətova