Deputat Rəfael və Coşqunla bağlı Hacıbala Abutalıbova müraciət etdi

Deputat Fazil Mustafa Bakı şəhəri İcra Hakimiyyətinin başçısı Hacıbala Abutalıbova məktub göndərib.

Lent.az-ın məlumatına görə, deputat “facebook” sosial şəbəkəsində paylaşdığı məktubda aktyorlar Rəfael və Coşqunun reklam lövhələrində qadın paltarında görünməsinə etirazını bildirib: “Bu afişalarda yer alan şəkillər Azərbaycan cəmiyyətinin müxtəlif təbəqələri arasında ciddi müzakirə mövzusuna çevrilmişdir. Belə ki, konkret bir reklama aid afişalarda qadın geyimi geyinmiş bəzi kişi cinsinə mənsub aktyorların gülümsəyərək, şirkətin təbliğatını həyata keçirməsi cəmiyyətimizin mənəvi mühitinin korlanmasına rəvac vermişdir. İnsanlar bir tərəfdə Olimpiya çempionlarının reklam çarxları ilə qürur duyur, digər tərəfdən isə qadın paltarı geymiş kişilərə baxıb xəcalət hissi keçirirlər. Onsuz da şəhərimizdəki nəqliyyat tıxaclarından təngə gəlmiş vətəndaşlarımızın üstəlik bu cür bədnam reklam afişalarından da psixoloji sarsıntılar yaşamasına yol vermək olmaz. Bakıya gələn xarici qonaqların da Azərbaycan kişilərinin qadın geyimində şəkillərini görüb ölkəmiz haqqında başqa cür düşünə biləcəklərini də diqqətə alaraq, cəmiyyətimizə hörmətsizlik gətirən bu afişaların dərhal yığışdırılması üçün tərəfinizdən tədbirlər görüləcəyinə ümid edirəm”.

Qeyd edək ki, Fazil Mustafa bir neçə gün öncə də aktyorlar Rəfael və Coşqunun qadın paltarında və jestləri ilə reklama çəkilmələrini, səhnəciklər oynamalarını ciddi tənqid eləmişdi. Aktyorlar isə deputatın bu fikirləri ilə razılaşmadıqlarını bildiriblər.