Türkiyəyə ərə getmək İradəyə baha başa gəldi!

Müğənni ötən şənbə günü İstanbula gedib

Aprelin 5-də qız toyu olan müğənni İradə İbrahimova ötən şənbə Türkiyəyə yola düşüb. Xəbər verdiyimiz kimi, aprelin 19-da müğənninin oğlan toyu keçiriləcək. Türkiyəyə ərə getmək müğənniyə hərtərəfli baha başa gəlib. Belə ki, toydan sonra İstanbuldakı evində yaşayacaq müğənni adət-ənənəyə uyğun olaraq özü ilə Türkiyəyə cehiz aparıb. Digər tərəfdən isə Bakıdakı bir çox işləri yarımçıq qalıb.

Müğənninin mətbuat katibi Zəminə xanımın Show.az-a verdiyi məlumata görə, oğlan toyunda İradə İbrahimovanın ailə üzvləri və yaxın qohum-əqrəbası da iştirak edəcək. Toydan sonra həyat yoldaşı Ceyhunla bal ayına çıxacaq müğənni gedəcəyi ölkənin adını bilmir. Bunu ona həyat yoldaşı sürpriz edəcək.

Mətbuat katibi əməkdaşımızla söhbət zamanı onu da bildirib ki, İstanbulda yaşamağı düşünən müğənni yaradıcılıq planlarını axsatmayacaq. Belə ki, müğənninin hazırlıq prosesində olan albomu, klip çəkilişləri yaxın aylarda reallaşacaq. İradə öz işlərini həyata keçirmək üçün mayda Bakıya gələcək.