İqtisadiyyata kredit qoyuluşu 15,2 faiz artıb
13 oktyabr 2010 17:43 (UTC +04:00)

İqtisadiyyata kredit qoyuluşu 15,2 faiz artıb

Bu il sentyabr ayının 1-ə qədərki müddətdə Azərbaycan iqtisadiyyatına cəmi kredit qoyuluşları 8788,6 mln. manat təşkil edib.

Mərkəzi Bankın mətbuat xidmətindən Lent.az-a verilən məlumata görə, bu göstərici ötən ilin müvafiq dövrü ilə müqayisədə 15,2% artıb.

Kredit qoyuluşlarının 423,7 mln. manatı vaxtı keçmiş kreditlərin payına düşüb.
Kreditlərin 29,8%-i və ya 2620,1 mln. manatı ev təsərrüfatlarına verilib. Ticarət və xidmət sahəsinə yönəldilən kreditlərin həcmi isə 2041,2 mln. manat (23,2%) olub. Nəqliyyat və rabitə sahəsinin payına kreditlərin 441,0 mln. manatı (5,0%), sənaye və istehsalın payına isə 645,7 mln. manatı (7,3%) düşüb.

Energetika, kimya və təbii ehtiyatlar sahəsinə kreditlərin 1078,0 mln. manatı və ya 12,3%-i, kənd təsərrüfatı və emalına 415,3 mln. manatı və ya 4,7%-i, inşaat və əmlak sahəsinə 610,0 mln. manat (7,3%), digər sahələrə isə 53,8 mln. manatı və ya 0,6%-i yönəldilib.

Kreditlərin 2445,8 mln. manatı (27,8%) qısamüddətli, 6342,7 mln. manatı (72,2%) isə uzunmüddətli kreditlər olub. Qısamüddətli kredit¬lə¬rin 188,4 mln. manatı və ya 7,7%-i, uzunmüddətli kreditlərin isə 235,3 mln. manatı və ya 3,7%-i vaxtı keçmiş kreditlərdir.

Dövlət bankı tərəfindən iqtisadiyyata 3865,8 mln. manat (44,0%), özəl banklar tərəfindən 4740,6 mln. manat (53,9%), qeyri-bank kredit təşkilatları tərəfindən isə 182,2 mln. manat (2,1%) kredit qoyulub.

Xarici kapitalın iştirakı ilə yaradılan banklar tərəfindən Azərbaycan iqtisadiyyatına 2184,6 mln. manat kredit yönəldilmişdir ki, bunun da ümumi kredit qoyuluşlarında xüsusi çəkisi 24,9%-ə bərabərdir. 100%-li xarici kapitalla fəaliyyət göstərən banklar isə 462,6 mln. manat (5,3%) kredit vermişlər.

Kreditlərin 5448,7 mln. manatı və ya 62,0%-i manatla, 3339,9 mln. manatı və ya 38,0%-i xarici valyuta ilə verilmişdir.
# 860

Oxşar yazılar