Şirvan Milli Parkında yanğının qarşısı alınıb - YENİLƏNİB - FOTO

Şirvan Milli Parkında baş verən yanğın lokallaşdırılıb.

APA-nın Mil-Muğan bürosunun məlumatına görə, yanğının qarşısı alınıb, ayrı-ayrı yerlərdə xırda alovların tam söndürülməsi üçün tədbirlər görülür.

17.24.

Bunu Lent.az-a açıqlamasında Ekologiya və Təbii Sərvətlər Nazirliyinin Ekologiya və təbiəti mühafizə siyasəti şöbəsinin sektor müdiri, baş vermiş yanğınla əlaqədar Şirvana ezam olunan Sədaqət Məmmədova bildirib.

Yanğının söndürülməsinə yanğınsöndürmə maşınları ilə bərabər vertolyotların da cəlb edildiyini bildirən Sədaqət Məmmədova deyib ki, hazırda yanğın lokallaşdırılıb: “Bura qoruq ərazisidir, ot biçilmir. Külək də qığılcımı yayır və görünməyən ərazilərdə yanğına səbəb olur. Ancaq Fövqəladə Hallar Nazirliyinin səyi nəticəsində hazırda yanğının söndürülməsi başa çatmaq üzrədir”.

Əsasən ot və kolluqlara ziyan dəydiyini söyləyən sektor müdiri qeyd edib ki, yanğının bütün bioloji müxtəlifliklərə, sürünənlərə, heyvanlara ziyan vurduğu istisna deyil: “Biz hazırda ceyranların olduğu əraziyə baxış keçiririk. Ceyranların yaşadığı ərazi yanğın baş verən yerdən bir qədər kənardadır. Biz hələlik yanğın nəticəsində ceyranların tələf olması halına rast gəlməmişik. Əraziyə baxış keçirməkdə davam edirik”.

****

17.25

Şirvan Milli Parkında baş verən yanğınla əlaqədar magistral yolda nəqliyyatın hərəkəti məhdudlaşdırılıb. APA-nın Mil-Muğan bürosunun məlumatına görə, ərazidə xeyli ağacı alov bürüyüb.

Yanğın nəticəsində Bakı-Ələt-Astara magistralında nəqliyyatın hərəkəti məhdudlaşdırılıb. Qoruqda məskunlaşan ceyranlara təhlükə yaranıb.

Əraziyə Fövqəladə Hallar Nazirliyinin xeyli sayda yanğınsöndürənləri, habelə helikopter cəlb olunub.

Yanğın 100 hektarlarla ərazini əhatə edib.

Hazırda yanğının söndürülməsi istiqamətində iş aparılır.

*****

16.20

Bu gün saat 14:50 radələrində Şirvan Milli Parkı ərazisində yanğın hadisəsi baş verib.

Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, ilkin ehtimalla yanğın yaxınlıqdan keçən Salyan OİL şirkətinə məxsus neft daşıyan avtomobilin keçməsindən dərhal sonra baş verib və əsən külək nəticəsində geniş əraziyə yayılıb.

Yanğın təbii və alaq otlarından ibarət olan 100 hektara yaxın ərazini əhatə edir. Yanğının söndürülməsi məqsədilə Ekologiya və Təbii Sərvətlər Nazirliyinin aparatı və yerli qurumlarının əməkdaşları təcili olaraq hadisənin baş verdiyi əraziyə ezam olunublar. Hazırda nazirliyin əməkdaşları və Fövqəladə Hallar Nazirliyinin yanğınsöndürmə dəstələri tərəfindən davam edən yanğının söndürülməsi və qarşısının alınması üçün təcili tədbirlər həyata keçirilir.