Binəqədidə külli miqdarda pul və qızıl oğurlamış şəxslər tutulub

Bakıda evlərdən oğurluq edən şəxslər tutulub. Bakı şəhər Baş Polis İdarəsindən Lent.az-a verilən məlumata görə, sentyabrın 25-də Binəqədi qəsəbəsində yaşayan Niyazi Quzanovun evindən qapının kilidini sındırmaq yolu ilə 10 min ABŞ dollar və 700 manat oğurlanıb. DİN BCAİ və Binəqədi RPİ CAŞ əməkdaşlarının keçirdiyi əməliyyat tədbirləri nəticəsində Bakı şəhər sakini Etibar Quliyev yanvarın 9-da yaxalanıb. Araşdırma zamanı müəyyən edilib ki, o, 2013-cü il yanvarın 9-da H.Babaşov küçəsində yaşayan Hüseyn Bağırovun evindən 1100 manat, avqustun 8-də Biləcəri qəsəbəsində Natiq Abbasovun evindən 1500 manat, dekabrın 13-də Biləcəri qəsəbəsində Habil İsmayılovun evindən 500 manat, qızıl-zinət əşyaları, dekabrın 16-da İ.Kərimov küçəsində Gülgəz Rəsulovanın evindən 530 manat, 450 Gürcü larisi, 150 Türk lirəsi, 1 cüt qızıl sırğa, dekabrın 18-də Biləcəri qəsəbəsi Y.İmanov küçəsində Yasər Həmzəliyevin evindən 700 manat, qızıl-zinət əşyaları oğurlayıb. Həmin vaxt qonşular cinayətkarı görüb, tutmaq istəyərkən o, əlindəki pulu və qızılları ataraq qaçıbr. Bu il isə yanvarın 3-də A.Zeynallı küçəsində Zeynəb Abbasovanın evindən qızıl əşyaları və yanvarın 6-da X.Məlikaslanov küçəsində Teymur Sadıqovun evindən 50 manat və qızıl-zinət əşyaları oğurlayıb.

Bundan başqa DİN BCAİ, Binəqədi RPİ CAŞ, 6-cı PB əməkdaşlarının keçirdiyi əməliyyat tədbirləri nəticəsində Bakı şəhər sakini, əvvəllər məhkum olunmuş Ramin Məmmədovdan 0,503 qram heroin götürülüb. Müəyyən edilib ki, o yanvarın 2-də Biləcəri qəsəbəsi Ordubadi küçəsində yaşayan Samirə Qaraşovanın evindən, qapının kilidini sındırmaq yolu ilə 1 ədəd qızıl üzük, 1 cüt qızıl sırğa və televizor oğurlayıb. Araşdırma zamanı müəyyən edilib ki, R.Məmmədov avqustun 15-də Motodrom yaşayış sahəsində yaşayan Fərhad Mikayılov evindən 3700 manat, qızıl-zinət əşyaları, sentyabrın 2-də Rüfət Əhmədzadənin evindən qızıl-zinət əşyaları, sentyabrın 25-də Sulutəpə qəsəbəsində Ramal Məmmədovun evindən qızıl-zinət əşyaları, dekabrın 21-də Motodrom yaşayış sahəsində Ziyafət Sadıqovun evindən televizor, pul, dekabrın 26-da Sulutəpə qəsəbəsində Ramiz Bədəlovun evindən pul və qızıl-zinət əşyaları oğurlayıb.

Araşdırmalar davam etdirilir.