Zabitimizin şəhid olması barədə RƏSMİ MƏLUMAT - YENİLƏNİB

Azərbaycan Müdafiə Nazirliyi Silahlı Qüvvələrin zabitinin şəhid olması barədə məlumat yayıb.

Nazirliyin mətbuat xidmətindən Lent.az-a verilən məlumatda bildirilir ki, düşmənin cəbhə bölgəsində təxribatları davam edir.

Yanvarın 27-də saat 12.30-da erməni silahlı bölmələri atəşkəs rejimini növbəti dəfə pozublar.

Nəticədə Silahlı Qüvvələrimizin zabiti, leytenant Əzizov Səbuhi Rüstəm oğlu döyüş tapşırığını yerinə yetirərkən düşmən tərəfindən açılan snayper atəşindən şəhid olub.

Müdafiə naziri, general-polkovnik Zakir Həsənovun əmri ilə döyüş postunda şəxsi şücaət göstərdiyinə görə leytenant Əzizov Səbuhi Rüstəm oğlu ölümündən sonra "Hərbi xidmətdə fərqlənməyə görə" 3-cü dərəcəli medalı ilə təltif edilib.

Şəhid zabitimizin silahdaşları and içiblər ki, leytenant Səbuhi Əzizovun xatirəsini həmişə uca tutacaq, onun intiqamını alaraq qanını yerdə qoymayacaqlar!

Müdafiə Nazirliyi rəhbərliyi şəhidin valideynlərinə və yaxınlarına dərin hüznlə baş sağlığı verir və səbir diləyir!

***

14.20

Azərbaycan zabiti şəhid oldu

Azərbaycan Ordusu daha bir şəhid verib.

APA-nın məlumatına görə, hadisə cəbhənin Ağdam istiqamətində qeydə alınıb. Ordumuzun zabiti, leytenant Səbuhi Rüstəm oğlu Əzizov düşmən gülləsinə tuş gəlib.

Nəticədə güllə yarası alan zabit şəhid olub.

Qeyd edək ki, S. Əzizov Şirvan şəhərindən həqiqi hərbi xidmətə çağırılıb.