Azərbaycan diasporunun rəhbərinə sui-qəsd edənlərin istintaqı başa çatıb

Ümumrusiya Azərbaycan Konqresinin (ÜAK) Ulyanovsk regional bölməsinin rəhbərinə qarşı sui-qəsddə günahlandırılan şəxslərin cinayət işinin istintaqı başa çatıb.

APA-nın Rusiya bürosunun məlumatına görə, Ulyanovsk vilayəti prokurorluğu ÜAK regional bölməsinin rəhbəri İslam Hüseynova qarşı sui-qəsddə günahlandırılan azərbaycanlılar - 46 yaşlı Cəfər Dilanov və 43 yaşlı Nahid Zahidov barəsində cinayət işinin istintaqını yekunlaşdıraraq məhkəməyə göndərib.

İstintaqla müəyyən olunub ki, 2011-ci ilin payızında İslam Hüseynovu ÜAK-ın regional bölməsinin sədri vəzifəsindən uzaqlaşdırmağa cəhd edən Cəfər Dilanov onun qətlini planlaşdırıb. C. Dilanov killerlər tutaraq 1,5 milyon rubl (təxminən 45 min ABŞ dolları) qarşılığında İ. Hüseynovun qətlini sifariş verib. İlkin olaraq killerlərə 480 min rubl verilib. C. Dilanov İ. Hüseynovun mühafizəçilərlə gəzdiyini bildiyindən onun yanında olan şəxslərin də fiziki cəhətdən məhv edilməsini əmr verib.

İstintaq materialında bildirilir ki, 2012-ci ilin sentyabrında Nahid Zahidov və onun qohumu 36 yaşlı Ramin Bağırov üzlərinə qara maska geyinərək, ÜAK-ın Ulyanovskda yerləşən regional bölməsinin ofisinə gəliblər. Onlar üzərlərində gəzdirdikləri «ИЖ-78-7,6» və «6П42» markalı tapançalardan İ. Hüseynov və onun mühafizəçisinə atəş açıblar. İ. Hüseynov onlara hücum edənlərə müqavimət göstərib. Bundan başqa, hadisənin baş verdiyi ofisin koridorunda olan digər şəxslər də cinayətkarlara planlarının həyata keçməsinə mane olublar. Hadisə nəticəsində İ. Hüseynov yaralanıb, onun İqor adlı mühafizəçisi isə həlak olub.

Cinayətkarlar hadisə yerindən qaçsalar da, C. Dilanov 2012-ci ilin sentyabrında Ulyanovsk, N. Zahidov 2013-cü ilin iyulunda Moskvada yaxalanaraq həbs olunublar, R. Bağırov isə beynəlxalq axtarışa verilib.

Təqsirləndirilən şəxslərə qarşı Rusiya Federasiyası Cinayət Məcəlləsinin 105.3.33 və 105.1.30-cu (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən iki və ya daha artıq şəxsi öldürmə), 222.2-ci (qanunsuz olaraq odlu silah gəzdirmə saxlama), 119.1-ci (ölümə cəhd və qəsdən sağlamlığa ağır zərər vurma), 116.1-ci (döyülmə) maddələri ilə ittiham irəli sürülüb. Əməlləri sübuta yetirildiyi təqdirdə təqsirləndirilən şəxsləri ömürlük azadlıqdan məhrumetmə cəzası gözləyir.