Bir gün əvvəl aldığı 500 ev quşu tələf oldu - FERMA YANDI - YENİLƏNİB

Ağstafada içərisində 500-ə qədər ev quşu olan ferma yanıb. APA TV-nin Qərb bürosunun verdiyi məlumata görə, hadisə rayonun Poylu qəsəbəsində baş verib.

Anar Rəsulova məxsus təsərrüfatda qeydə alınan yanğında 100-ə qədər toyuq-cücə boğularaq tələf olub. Bundan başqa tikilinin dam örtüyünün tavan hissəsinin yanar konstruksiyaları yanaraq sıradan çıxıb.

Hadisə yerinə dərhal Ağstafa Rayon Yanğından Mühafizə Hissəsinin əməkdaşları cəlb olunub. Alov söndürülüb. Təsərrüfat sahiblərinin dediyinə görə, 500-ə qədər toyuq-cücə bir gün əvvəl alınaraq fermaya gətirilibmiş.

Yanğının baş vermə səbəbləri araşdırılır.

07:20

Ağstafada yanğın hadisəsi qeydə alınıb.

APA-nın Fövqəladə Hallar Nazirliyinin (FHN) saytına istinadən verdiyi xəbərə görə, Ağstafa rayonu, Poylu kəndində vətəndaşa məxsus ümumi sahəsi 200 m2 olan fermanın 60 m2 sahədə tavan hissəsi yanıb.

Fermanın qalan hissəsi yanğından mühafizə olunub. Yanğın saat 05:58-də yanğınsöndürənlər tərəfindən söndürülüb.